Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 923 Hüküm no: 759 Orijinal metin no: [172a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefat eden eşi Mahmud Efendi’de alacağı olduğunu ispat ettiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan b. Ali’nin verâseti zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Safiye Hatun bt. Ahmed Efendi mahfil-i kazâda müteveffâ-yı mezbûrun tesviye-i umûruna li-ecli’d-da‘vâ vasî nasb olunan İbrahim Efendi b. Yusuf mahzarında üzerine da‘vâ ve takrîr-i kelâm edip zevcim müteveffâ-yı mezbûr Mahmud Efendi b. Hasan b. Ali zimmetinde bir Mushaf-ı şerîf hediyesi olan on iki guruş ve beynimizde ilm-i şer‘î ile ma‘lûme câriye semeninden otuz sekiz guruş cem‘an elli guruş hakkım olup hattâ ciheteyn-i mezkûreteynden bana ol kadar guruş zimmetinde vâcibü’l-edâ deyni olduğunu târîh-i kitâbdan üç sene mukaddem hâl-i kemâl-i sıhhatinde huzûr-ı Müslimînde ikrâr <> işhâd edip deyn-i merkūmu nâtık mu‘anven ve mersûm işbu deyn temessüğünü dahi yedime def‘ u teslîm edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre sükkânından İmâm Ahmed Efendi b. Hamza ve Molla Hüsrev mahallesinde sâkin İmâm İbrahim Efendi b. Halil ve el-Hâc Mehmed Ağa b. el-Hâc Mustafa li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mahmud Efendi b. Hasan b. Ali târîh-i mezbûrda ciheteyn-i mezkûreteynden zevcesi işbu müdde‘iye-i mezbûreye zimmetinde vâcibü’l-edâ elli guruş deyni olduğunu hâl-i kemâl-i sıhhatinde bizim huzûrumuzda ikrâr ve bizi işhâd edip deyn-i mezbûru nâtık işbu deyn temessüğünü mezbûreye def‘ u teslîm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî gurreti Recebi’l-mürecceb sene 1110 Şuhûdü’l-hâl: Eş-şâhidûnü’s-sâbikūn.