Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 928 Hüküm no: 765 Orijinal metin no: [173a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mahmud Efendi’nin küçük kızı ile cariyesine nafaka takdir edildiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın sulbiye sagīre kızı Zeyneb’in vâlidesi ve hâdinesi olup zâtı ta‘rîf-i şer‘î ile mu‘arrefe olan hâfızatü’l-kitâb Safiye Hatun bt. Ahmed Efendi mahfil-i kazâda takrîr-i kelâm edip kızım sagīre-i mezbûre Zeyneb’in ve bir re’s câriyesinin nafaka ve kisveye eşedd-i ihtiyâcı olmağın babası müteveffâ-yı mezbûrdan müntakil malından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde mezbûre Safiye Hatun’un kelimât-ı meşrûhası vâkı‘a mutâbıka idiği lede’ş-şer‘i’l-enver zâhir ve mukarrer olmağla hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri mezbûre Zeyneb’in mal-ı müntakilinden para üçer akçeye olmak üzere yevmî yirmişer akçe nafaka ve kisve-bahâ farz ve takdîr edip meblağ-ı mezbûr yevmî yirmişer akçeyi sagīre-i mezbûrenin ve câriyesinin levâzım-ı zarûriyesine harc ü sarfa ve inde’z-zarûre istidâneye ve lede’z-zafer malına rücû‘a mezbûre Safiye Hatun’a izin birle mâ-vaka‘a kayd-şüd. Fî gurreti Receb sene 1110 Şuhûdü’l-hâl: Ali Efendizâde Mehmed Efendi, Mustafa Efendi el-Müezzin, fahrü’l-müderrisîn Ahmed Efendi b. İbrahim, İmâm Ahmed Efendi b. Hamza, İbrahim Efendi b. Halil, Hüseyin Bey b. Halil Paşa, el-Hâc Ali Efendi b. Mehmed, el-Hâc Mehmed Ağa b. Mustafa ve gayruhum.