Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 928 Hüküm no: 766 Orijinal metin no: [173a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefat eden eşinin terekesine ait olduğu iddia edilen eşyaların kendisine ait olduğunu ispat ettiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın verâseti zevce-i menkûha-i metrûkesi Safiye Hatun bt. Ahmed Efendi ile sagīre kızı Zeyneb’e münhasıra oldukdan sonra sagīre-i mezbûrenin tesviye-i umûruna li-ecli’d-da‘vâ vasî nasb olunan İbrahim Efendi b. Yusuf mahfil-i kazâda müteveffâ-yı mezbûrun zevce-i menkûha-i metrûkesi olup zâtı mahalle-i mezbûre sükkânından el-Hâc Mehmed Ağa b. Mustafa ve el-Hâc Ali Efendi b. Mehmed ta‘rîfleriyle mu‘arrefe olan bâ‘isetü’l-kitâb mezbûre Safiye Hatun mahzarında üzerine da‘vâ ve takrîr-i kelâm edip müteveffâ-yı mezbûrun terekesinden işbu a‘yânı mevcûde ve ricâl ve nisâya sâliha on bir yemenî yastık ve bir müsta‘mel orta keçesi ve iki yan keçesi ve üç kırmızı kilim ve altı minder ve on iki elvan yorgan ve iki Yanbolu kebesi ve dokuz tane beledî yastık ve def‘a iki yan keçesi ve bir köhne sagīr kaliçe ve bir mâî velense ve dört beledî döşek ve def‘a dört yastık ve taşrada iki kumaş yastık ve on beş sagīr ve kebîr sahan ve altı tencere ve altı kapak ve iki sini ve üç kahve ibriği ve iki kahve tepsisi ve iki leğen ve iki ibrik ve bir kazgan ve iki güğüm ve bir ocak güğümü ve iki hoşâb tası ve iki kapaksız tas mecmû‘u müteveffâ-yı mezbûrun terekesinden iken mezbûre Safiye Hatun bi-gayr-ı hakkın müstakilleten ahz u kabz ve terekeye idhâlden imtinâ‘ eder suâl olunsun dedikde gıbbe’s-suâl mezbûre cevâbında zikr olunan eşyâ benim kendi mülk ve hakkım olup zevcim müteveffâ-yı mezbûrun aslâ alâka ve medhali yokdur deyü def‘le mukābele ve istintâk olunsun dedikde gıbbe’l-istintâk ve’l-inkâr metâ‘-ı beytden ricâl ve nisâya sâliha eşyâ ma‘a yemînü’l-Hay kavl-i Hayy’ın(?) olup vasiyy-i mezbûrun beyyinesi olmamağla eşyâ-i mezkûre kendinin mülk ve hakkı olup terekeden olmadığına mezbûre Safiye Hatun’a yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle vasiyy-i mezbûr bî-vech mu‘ârazadan men‘ birle mâ-vaka‘a kayd-şüd. Fî gurreti Receb sene 1110 Şuhûdü’l-hâl: Eş-şâhidûnü’s-sâbikūn.