Bab Mahkemesi 54 Numaralı Sicil (H. 1102 / M. 1691) cilt: 20, sayfa: 72 Hüküm no: 31 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bekir b. Mahmud’un vasiyeti Husûs-ı câ’i’z-zikrin mahallinde tahrîri iltimâs olunmağın, savb-ı şer‘-i münîrden irsâl olunan Mevlânâ es-Seyyid Abdülhay Efendi mahmiye-i İstanbul’da Mimar Ayas mahallesinde sâkin el-Hâc Bekir b. Mahmud b. Derviş’in menziline varıp, zeyl-i kitâbda muharrerü’l-esâmi udûl-i müslimîn huzûrunda akd-i meclis-i şer‘-i mübîn eyledikde, merkūm el-Hâc Bekir hasta olduğu hâlde meclis-i ma‘kūd-ı mezkûrda zevcesi olup zâtı es-Seyyid Hasan Çelebi b. Mustafa ve Halil Çelebi b. Bâli ta‘rîfleriyle mu‘arrefe olan Hamide Hâtun bt. el-Hâc Hasan mahzarında ikrâr ve takrîr-i kelâm edip, sülüs-i mâlımdan üç yüz guruşu ifrâz ve kardeşim işbu hâzır bi’l-meclis el-Hâc Hasan’a teslîm etmişdim. Bi emrillâhi te‘âlâ fevt olduğumda meblağ-ı mezbûrdan sünnet-i seniyye üzre techîz ve tekfîn ve iskāt ve sâir levâzım ve tasaddukāt ve it‘âm-ı ta‘âm mesârifi kemâ hüve hakkuhû görüldükden sonra bâkī kalanı vücûh-ı birre sarf oluna ve yine sülüs-i mâlımdan iki bin akçe işbu dâye Sâliha bt. Abdullah ve iki bin akçe mezbûre Hamide Hâtun’un mu‘tekası Kalender bt. Abdurrahman’a verile deyu vasiyyet edip, bu vasiyyetimin tenfîzine ve işbu sagīr oğlum Ahmed’in tesviye-i umûruna dahi zevcem mezbûre Hamide Hâtun’u vasiyy-i muhtâr nasb ve ihtiyâr edip ve işbu kardeşim mezbûr el-Hâc Hasan’ı dahi nâzır ta‘yîn eyledim dedikde, mezbûrân Hamide Hâtun ve el-Hâc Hasan dahi vesâyet ve nezâret-i mezbûreyi kabûl ve merâsimini edâya ta‘ahhüd ve iltizâm etmeğin, vâki‘ hâli mevlânâ-yı mezkûr mahallinde tahrîr, ba‘dehû ma‘an ba‘s olunan çukadâr el-Hâc Hasan Beşe ve İbrahim Çelebi b. Mehmed ile meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ve’l-ibtigā ketb olundu. Tahrîren fi’l-yevmi’l-hâmis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İmâm Abdüllatîf Efendi b. Mehmed, Kadri Beşe b. Receb, Osman Çelebi b. Ahmed, el-Hâc Ali b. Hasan, es-Seyyid Hasan Çelebi Mustafa, İbrahim Çelebi nâib-i imâm, Molla Mustafa b. ( ) el-müezzin, Mehmed Çelebi b. Ali, Yusuf Bey b. Abdi, Mustafa Reis b. Abdi.