Bab Mahkemesi 54 Numaralı Sicil (H. 1102 / M. 1691) cilt: 20, sayfa: 73 Hüküm no: 32 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Ahmed üzerine oğlu İbrahim için nafaka takdir edilmesi Mahmiye-i İstanbul’da Demirhan mahallesi sâkinelerinden Havva bt. Halil nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i mutallıkı Hammal Receb b. Ahmed nâm kimesne mahzarında takrîr-i kelâm ve ta‘bîr ani’l-merâm edip, zevcim mezbûrun firâşından hâsıl ve benden mütevellide olup bi hakkı’l-hidâne hacr ve terbiyemde olan sagīr oğlum İbrahim’in nafaka ve kisve ve sâir levâzım-ı mühimmesi için kıbel-i şer‘den babası mezkûr üzerine kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü-me’âb- hazretleri dahi sagīr-i mezbûrun nafaka ve kisve-bahâ ve sâir levâzım-ı mühimmesi için tarafeynin rızâsıyla târih-i kitâbdan yevmî dörder akçe farz ve takdîr edip, meblağ-ı mefrûz-ı mezbûru sagīr-i mezbûrun nafaka ve kisve-bahâ ve sâir levâzım-ı mühimmesine harc ve sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Havva’ya izin vermeğin, mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ali b. Şaban, el-Hâc Ali b. Abdullah, Mehmed Efendi b. Hasan, Ali b. Bâli, el-Hâc Halil b. Ali.