Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 948 Hüküm no: 781 Orijinal metin no: [177b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefat eden eşi Mehmed Efendi’deki mehir bedelinin terekeden ödenmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Ahmed Efendi b. el-merhûm Mustafa Efendi mahmiye-i İstanbul’da Haraccı Muhyiddin mahallesi ahâlîsinden iken bundan akdem vefât eden Hâfız Mehmed Efendi b. Ahmed b. Osman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi Şerife Fâtıma Hatun bt. Ali Çelebi b. Abdurrahman tarafından husûs-ı âti’l-beyânda taleb ve da‘vâ ve ahz u kabza vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Ali Çelebi b. Mahmud ve İbrahim Çelebi b. Musa şehâdetleriyle mahzar-ı hasm-ı câhidde sâbit olup sübût-ı vekâletine hükmolunan Mustafa Çelebi b. Mehmed meclis-i ma‘kūd-ı mezbûrda müteveffâ-yı mezbûrun evlâd-ı sıgārı İbrahim ve Süleyman’ın vasiyy-i muhtârları olmağla terekesine vaz‘-ı yed eden Süleyman Çelebi b. Osman mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Hâfız Mehmed Efendi b. Ahmed b. Osman hayâtında tezevvüc murâd ettiğinde târîh-i fevtinden iki buçuk sene mukaddem yüz elli guruş mehr-i müeccel tesmiyesiyle müvekkilem mezbûre Şerife Fâtıma Hatun bt. Ali’yi huzûr-ı Müslimînde tezevvüc ve kabûl edip akd-i nikâh beynlerinde kāim iken meblağ-ı mezbûru kable’l-edâ fevt olmağla terekesinden taleb ederim suâl olunup meblağ-ı mezbûru tereke-i müteveffâ-yı mezbûrdan bana edâya vasiyy-i mezbûra tenbîh olunmak matlûbumdur dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin vekîl-i merkūmun vech-i mezkûr üzere müdde‘âsını inkâr edicek vekîl-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden şâhidân-ı mezbûrân Ali Çelebi b. Mahmud ve İbrahim Çelebi b. Musa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hâfız Mehmed Efendi b. Ahmed b. Osman hayâtında tezevvüc murâd ettiğinde târîh-i fevtinden iki buçuk sene mukaddem yüz elli guruş mehr-i müeccel tesmiyesiyle müvekkile-i mezbûre Şerife Fâtıma Hatun bt. Ali’yi huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’l-müvekkileti’l-mezbûre mûcebiyle ba‘de’l-hükm ve’t-tenbîh vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan İbrahim Çelebi b. Mehmed ve Nuh Çelebi b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 15 min-Rebî‘ülâhir sene 1110 Şuhûdü’l-hâl: İmâm Ahmed Efendi b. Şa‘bân, Ahmed Efendi b. İsmail, Yahya Çelebi b. Hasan, Süleyman Çelebi b. Ahmed, Hasan Çelebi b. Abdullah, İvaz b. Abdullah.