Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 949 Hüküm no: 782 Orijinal metin no: [177b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in vefat eden Ayşe Hatun’un vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Ayasofya-i kebîr kurbünde Üskübî mahallesinde sâkine iken bundan akdem vefât eden Âişe Hatun bt. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i mübîn eyledikde müteveffât-ı mezbûrenin zâhir[de] vâris-i ma‘rûfu olmamağla cemî‘ terekesi cânib-i beytülmâle âid oldukdan sonra müteveffât-ı mezbûrenin vech-i âtî üzere vasiyy-i muhtârı olduğunu iddi‘â eden mahalle-i mezbûrede sâkin bâ‘isü’l-kitâb Mustafa Bey b. Abdullah meclis-i ma‘kūd-ı mezbûrda mahmiye-i mezbûrede bi’l-fi‘il beytülmâl-i hâssa emîni olan fahrü’l-eşbâh Mustafa Ağa b. Abdülmennan tarafından müseccel vekîl olmağla tereke-i müteveffât-ı mezbûreye bi’l-emâne vaz‘-ı yed ve kıbel-i şer‘den husûmet ve redd-i cevâba me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip müteveffât-ı mezbûre Âişe Hatun bt. Abdullah b. Abdullah hâl-i marazında bi-emrillâhi te‘âlâ fevt olduğumda ber-vech-i mesnûn techîz ve tekfînim ve sâir levâzım-ı mu‘tâdem görülüp ba‘dehû cemî‘ terekemin sülüsü ifrâz olunup meblağ-ı müfrez-i mezbûrdan beş guruş iskāt-ı salâtıma verilip ve yirmi beş guruş ile eyyâm-ı mu‘tâde-i mübârekede tabh-ı ta‘âm ve it‘âm-ı fukarâ oluna ve bâkī kalan fazla-i sülüs vücûh-ı birre sarf oluna ve terekemin sülüsânı mevlâ-yı ıtâkım Yusuf Ağa’nın sulbî oğlu ve usûbet-i nesebiye [sebebiye] cihetinden hasren vârisim olup Vilâyet-i Rumeli’nde Silistre kazâsında sâkin Ahmed Ağa’ya îsâl oluna deyü huzûr-ı Müslimînde vasiyet edip tenfîzine beni vasiyy-i muhtâr nasb ü ta‘yîn edip ben dahi muvâcehesinde ba‘de’l-kabûl musırraten alâ-îsâihâ fevt olup tenfîz-i vesâyâ murâd eylediğimde mezbûr Mehmed Çelebi mâni‘ olur suâl olunsun dedikde gıbbe’s-suâl mezbûr Mehmed Çelebi cevâbında vech-i muharrer üzere tereke-i müteveffât-ı mezbûreye vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahalle-i mezbûrede sâkin Veli Efendi b. Receb ve el-Hâc Yusuf b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Âişe Hatun bt. Abdullah b. A[bdullah] hâl-i marazında bi-emrillâhi te‘âlâ fevt olduğumda ber-vech-i mesnûn techîz ve tekfînim ve sâir levâzım-ı mu‘tâdem görülüp ba‘dehû cemî‘ terekemin sülüsü ifrâz olunup meblağ-ı müfrez-i mezbûrdan beş guruş iskāt-ı salâtıma verilip ve yirmi beş guruş ile eyyâm-ı mu‘tâde-i mübârekede tabh-ı ta‘âm ve it‘âm-ı fukarâ oluna ve bâkī kalan fazla-i sülüs vücûh-ı birre sarf oluna ve terekemin sülüsânını mevlâ-yı ıtâkam Yusuf Ağa’nın sulbî oğlu ve usûbet-i nesebiye [sebebiye] cihetinden hasren vârisim olup Vilâyet-i Rumeli’nde Silistre kazâsında sâkin Ahmed Ağa’ya îsâl oluna [178a] deyü huzûrumuzda vasiyet edip tenfîzine işbu müdde‘î-i mezbûru vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırraten alâ-îsâihâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr edip ba‘dehû ma‘an ba‘s olunan Hasan b. Abdullah ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 11 min-Recebi’l-ferd [sene 1110] Şuhûdü’l-hâl: Mehmed Çelebi tâbi‘-i Beytülmâl, Ahmed Çelebi b. Abdullah, Mustafa Çelebi b. Abdullah, Şa‘bân Sofu, İbrahim Çelebi b. Mehmed, Hüseyin Çelebi b. Mehmed, İsmail Çelebi b. Mehmed, Mehmed Çelebi b. İdris.