Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 950 Hüküm no: 783 Orijinal metin no: [178a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’ya babasından intikal eden vakıf odanın satışı için vasisine izin verildiği Mahmiye-i İstanbul’da Karabaş mahallesinde sâkine iken bundan akdem vefât eden Emine Hatun bt. Abdullah’ın sulbî sagīr oğlu Mustafa’nın babası ve tesviye-i umûruna vasiyy-i mansûbu bâ‘isü’l-kitâb Mehmed Beşe b. Mahmud mahfil-i kazâda takrîr-i kelâm edip müteveffât-ı mezbûrenin merhûm Bektaş Ağa Vakfı olan odalardan vakf-ı mezbûra ayda on beş akçe icâre ile taht-ı tasarrufunda olup ba‘de vefâtihâ intikāl-i âdî ile sagīr oğlu mezbûr Mustafa’ya intikāl eden mahalle-i mezbûrede vâki‘ bir tarafdan Muharrem Beşe tasarrufunda olan vakıf menzil ve bir tarafdan Ali b. Kurt tasarrufunda olan vakıf menzil ve bir tarafdan Mustafa Çelebi b. Abdurrahman’ın mülk menzili ve bir tarafdan tarîk-i hâs ile mahdûd vakıf odanın ayda on beş akçe icâresini cânib-i vakfa edâya sagīr-i mezbûrun malı olmadığından gayrı harâba müşrif olup hâsılı harcına vefâ etmemekle oda-i mezkûre izn-i mütevellî ve bedel-i misli ile âhara ferâğ ve tefvîz sagīr-i mezbûr hakkında enfa‘ ve evlâ olmağın âhara ferâğa kıbel-i şer‘den me’zûn olmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka idiği mahalle-i mezbûre sükkânından zeyl-i vesîkada muharrerü’l-esâmî Müslimîn haberleriyle lede’ş-şer‘i’ş-şerîf zâhir ve mukarrer olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri oda-i mezkûreyi izn-i mütevellî ve bedel-i misli ile âhara ferâğ ve tefvîze vasiyy-i mezbûra izin birle mâ-vaka‘a kayd-şüd. Fî 15 min-Receb sene 1110 Şuhûdü’l-hâl: Mehmed Efendi b. Hasan el-İmâm, Ali Çelebi b. Ahmed, Receb Beşe b. Mustafa, Hüseyin Bey b. Nebi, Mustafa Çelebi b. Abdurrahman, Ahmed Beşe b. Mehmed, Mehmed Beşe b. Hüseyin.