Bab Mahkemesi 54 Numaralı Sicil (H. 1102 / M. 1691) cilt: 20, sayfa: 74 Hüküm no: 33 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa Ağa b. Mehmed’in Ayşe bt. Abdurrahman’dan aldığı rüşveti iade etmesi
Mahmiye-i İstanbul’da Murad Paşa-yı Atîk mahallesinde sâkine Ayşe bt. Abdurrahman nâm hâtun tarafından husûs-ı âti’l-beyâna vekîl olduğu zâtını ârifân olan Mustafa b. Ahmed ve diğer Mustafa b. Mehmed şehâdetleriyle sâbit olan işbu bâ‘isü’r-rakīm Ahmed Ağa b. Abdülmennân nâm kimesne meclis-i şer‘-i şerîfde, Mustafa Ağa b. Mehmed nâm kimesne mahzarında bi’l-vekâle üzerine da‘vâ ve takrîr-i kelâm edip, müvekkile-i mezbûre bundan akdem bir husûs için Eyyûb nâm kimesne yediyle mezbûr Mustafa Ağa’ya bi tarîki’r-rüşve yüz guruşunu def‘ ve teslîm, ol dahi ber vech-i muharrer ahz u kabz etmekle, suâl olunup alıverilmesi matlûbumdur dedikde, gıbbe’s-suâl ve’l-inkâr, müdde‘î-i mezbûrdan müdde‘âsını mübeyyine beyyine taleb olundukda, udûl-i müslimînden olup mahalle-i mezbûre sükkânından Hüseyin Ağa b. Mehmed ve Mahmud Ağa b. Ali nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka müvekkile-i mezbûre Ayşe Hâtun minvâl-i meşrûh üzre mezbûr Eyyûb yediyle bi tarîki’r-rüşve yüz guruşunu işbu mesfûr Mustafa Ağa’ya bizim huzûrumuzda def‘ ve teslîm, ol dahi ahz u kabz eyledi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebince meblağ-ı mezbûr yüz guruşu müdde‘î-i mezbûre edâ ve teslîme mezkûr Mustafa Ağa’ya tenbîh olunmağın, mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene isneteyn ve mi’e ve elf.
Şuhûdü’l-hâl: İbrahim Çelebi b. Ahmed, Ali Çelebi b. ( ), İbrahim Ağa b. ( ), Ali Çelebi b. ( ), Nasuhî Efendi el-kâtib.
|