Bab Mahkemesi 54 Numaralı Sicil (H. 1102 / M. 1691) cilt: 20, sayfa: 74 Hüküm no: 34 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Mustafa’nın Ahmed Çelebi b. Mehmed’e olan borcunu vasîsinin ödemesi Dergâh-ı âlî bevvâblarından Ahmed Çelebi b. Mehmed meclis-i şer‘-i şerîf-i enverde, mahmiye-i İstanbul’da Davudpaşa Câmi‘-i şerîfi kurbunda sâkin cünûn-ı mutabbak ile mecnûn olan Osman Ağa b. el-merhûm Mustafa Halîfe’nin tesviye-i umûru için kıbel-i şer‘den mansûb vasîsi olan bâ‘isü hâze’l-kitâb umdetü erbâbi’t-tahrîr ve’l-kalem Zeki Ali Efendi tarafından husûs-ı âti’l-beyânı tasdîka vekîl-i sâbitü’l-vekâlesi olan Mehmed Çavuş mahzarında ikrâr ve i‘tirâf edip, ben mecnûn-ı mezkûrun akārât-ı icârâtını cem‘ ve tahsîl ve zimem-i nâsda olan hukūkunu kabz ve menzili mesârifine sarfa kadı-i mûmâ-ileyh tarafından vekîl olmağla, ben dahi işbu yedimde olan hüccet-i şer‘iyye nâtıka olduğu üzre bin doksan üç senesi Zilka‘desi gurresinden bin yüz senesi Recebü’l-müreccebi’ne gelince uhdeme edâsı lâzım gelen hizmeti edâ etmekle, zikr olunan şehr-i Recebü’l-ferd selhinde ma‘rifet-i şer‘iyye ile muhâsebem görüldükde, mecnûn-ı mezbûrun icârâtından ve zimemden tahsîl eylediğim mâldan gayrı müddet-i mezkûrede mühimmât-ı mecnûn-ı mezbûra kendi mâlımdan yirmi iki bin yüz elli iki akçe sarf eylediğim lede’ş-şer‘i’l-enver sâbit ve müte‘ayyin olup, hattâ meblağ-ı mezbûr, mâl-ı mecnûn-ı mezbûrdan bana teslîm olunmak üzre hükm-i şer‘î dahi lâhık olmuşdu. El-hâletü hâzihî vasiyy-i mûmâ-ileyh Zeki Ali Efendi mâl-ı mecnûn-ı mezbûrdan masrûfum olan meblağ-ı mezbûr yirmi iki bin yüz elli [iki] akçeyi bana teslîm, ben dahi ahz u kabz edip, meblağ-ı mezbûrdan bir akçe ve bir habbe hakkım kalmayıp, husûs-ı mezbûra müte‘allika kat‘â da‘vâ ve nizâ‘ım kal[ma]mışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî evâhiri Cemâziyelevvel li sene isneteyn ve mi’e ve elf. Şuhûdü’l-hâl: Mehmed Çavuş b. Musa, Mehmed Bey b. Şaban, Mehmed Bey b. Ali, Ahmed Çelebi b. Ömer, Yusuf Efendi b. Abdurrahman.