Bab Mahkemesi 54 Numaralı Sicil (H. 1102 / M. 1691) cilt: 20, sayfa: 75 Hüküm no: 35 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İvaz b. Ahmed’in borcunu kefili Safiye bt. Abdullah’ın ödemesi Mahmiye-i İstanbul’da Manisalı Çelebi mahallesinde sâkin bâ‘isü hâze’l-kitâb el-Hâc Ramazan b. Abdullah nâm kimesne meclis-i şer‘-i şerîf-i enverde, Safiye bt. Abdullah mahzarında üzerine da‘vâ ve takrîr-i kelâm edip, mezbûr[e] Safiye Hâtun’un zevci işbu hâzır bi’l-meclis İvaz b. Ahmed işbu yedimde olan deyn temessüküm nâtıka olduğu üzre bin doksan sekiz senesinde istidâne ve kabz eylediği altmış buçuk guruşa merkūm Safiye Hâtun tarafından emr-i kabûlü hâviye kefâlet-i sahîha-i şer‘iyye ile kefîl olmağla, kefâletine binâ’en meblağ-ı mezbûru merkūme Safiye Hâtun’dan taleb eylediğimde bana edâdan imtinâ‘ eder, hâlâ mezbûre Safiye Hâtun’a suâl olunup kefâletine binâ’en ve meblağ-ı mezbûrun alıverilmesi matlûbumdur dedikde, gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda, mahalle-i mezbûre sükkânından Mehmed b. Mustafa ve Osman b. Ahmed ve Mehmed b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mezbûre Safiye Hâtun’un zevci mezbûr İvaz b. Ahmed müdde‘î-i mezbûr el-Hâc Ramazan yedinden işbu yedinde olan deyn temessükü nâtıka olduğu üzre târih-i mezkûrde istidâne ve kabz eylediği meblağ-ı mezkûr altmış buçuk guruşa mezbûre Safiye Hâtun bizim huzûrumuzda tarafeynden emr ve kabûlü hâviye kefâlet-i sahîha-i şer‘iyye ile kefîl olmuşdu. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebince meblağ-ı mezkûr altmış buçuk guruşu kefâletine binâ’en müdde‘î-i mezbûre edâ ve teslîme merkūm Safiye Hâtun’a ba‘de’t-tenbîh, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mehmed b. Hasan, Ali b. Bâli, Ahmed b. Mehmed.