Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 991 Hüküm no: 806 Orijinal metin no: [184b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in vefat eden babası Halil’in vasisinden miras hissesini teslim aldığı Mahmiye-i İstanbul’da Mahmud Paşa ahâlîsinden olup bu sene-i mübârekede hacc-ı şerîfe sefîne ile giderken Sakız cezîresinde vefât eden el-Hâc Halil b. Ömer b. Abdullah’ın verâseti zevce-i menkûha-i metrûkesi Emine Hatun bt. Şa‘bân ile sagīr oğlu İbrahim’e münhasıra olduğu şer‘an zâhir ve müte‘ayyin oldukdan sonra sagīr-i mezbûr İbrahim’in kıbel-i şer‘den vasiyy-i mansûbu olup zâtı ta‘rîf-i şer‘î ile mu‘arrefe olan Âişe Hatun bt. Şükrullah meclis-i şer‘-i şerîf-i enverde müteveffâ-yı mezbûrun yanında mevcûd olan terekesini veresesine îsâle vasiyy-i muhtârı olup terekesine vaz‘-ı yed eden hâfızü’l-kitâb es-Seyyid el-Hâc Mehmed Çelebi b. es-Seyyid Hüseyin mahzarında bi’l-vesâye ikrâr-ı tâm ve takrîr-i kelâm edip müteveffâ-yı mezbûr el-Hâc Halil b. Ömer’in terekesinden olup vasiyy-i mezbûr es-Seyyid el-Hâc Mehmed’in Sakız kassâmı defteri mûcebince makbûzu olup ba‘de ihrâci’l-mesârif yedinde olan altı yüz beş kıt‘a esedî guruş ile bir altın yemenî hâtem ve bir sîm yemenî hâtem ve üç taşlı bir altın yüzük ve bir çift sîm bileziğini bana tamâmen def‘ u teslîm ben dahi bi’l-vesâye yedinden ahz u kabz edip tereke-i müteveffâ-yı mezbûrdan bâkī zimmetinde bir akçe ve bir habbe kalmadı dedikde gıbbe’t-tasdîkı’l-mu‘teberi’l-vicâhî mâ-vaka‘a kayd-şüd. Fî 11 Recebi’l-ferd sene 1110 Şuhûdü’l-hâl: Fahrü’l-müderrisîn Mehmed Efendi, Fahrü’l-müderrisîn es-Seyyid Abdülmuti Efendi, Yahya Efendi b. Mustafa Efendi, Velizâde Mehmed Efendi, Şeyhzâde Ahmed Efendi, Şeyhzâde Süleyman Efendi, Ahmed b. Mehmed, Hüseyin Beşe b. Mustafa, Hacı Ahmed b. Yusuf, Hüseyin b. Receb, Müezzin el-Hâc Mehmed, Ahmed Çelebi b. Süleyman.