Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 992 Hüküm no: 807 Orijinal metin no: [184b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden eşi Abdullah’daki mehir bedelini terekeden teslim aldığı Mahmiye-i İstanbul’da Kasab Demir Han mahallesinde sâkin iken bundan akdem vefât eden el-Hâc Abdullah b. Mehmed b. Ahmed’in verâseti zevce-i menkûha-i metrûkesi Âişe Hatun bt. Abdullah ile li-ebeveyn karındaşı oğlu olup hâlâ diyâr-ı âharda sâkin Said b. Mehmed nâm gāibe münhasıra oldukdan sonra zâtı mahalle-i mezbûre ahâlîsinden Yahya Efendi b. el-merhûm Mustafa Efendi ve Mehmed Efendi b. Veliyüddin ta‘rîfleriyle mu‘arrefe olan hâfızatü’l-kitâb mezbûre Âişe Hatun mahfil-i kazâda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine vaz‘-ı yed eden Mehmed b. Said mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Abdullah b. Mehmed b. Ahmed târîh-i kitâbdan on yedi sene mukaddem tezevvüc murâd ettikde şuhûd mahzarlarında beni iki bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden mu‘arrif-i mezbûr Mehmed Efendi b. Veliyüddin ile mahmiye-i mezbûrede el-Hâc Hasan mahallesinde sâkin Berber Yusuf Çelebi b. Abdullah li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr el-Hâc <> Abdullah b. Mehmed b. Ahmed târîh-i mezbûrda tezevvüc murâd ettikde işbu müdde‘iye-i mezbûre Âişe Hatun’u iki bin sağ akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken fevt oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm müdde‘iye-i mezbûre Âişe yine mahfil-i kazâda mezbûr Mehmed b. Said mahzarında ikrâr ve takrîr-i kelâm edip ânifen bana hükm-i şer‘î lâhık olan iki bin sağ akçe mehr-i müeccel hakkımı terekeden olmak üzere mezbûr Mehmed yedinden tamâmen ahz u kabz eyledim min-ba‘d meblağ-ı mezbûrdan vasiyy-i mezbûr yedinde bir şey kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 4 min-Rebî‘ülâhir sene 1110 Şuhûdü’l-hâl: el-Hâc Ali b. Abdullah, Ahmed Çelebi b. Süleyman, Mehmed Çelebi b. Hüseyin, Hüseyin Çelebi b. Mehmed, Ömer Çelebi b. Mehmed.