Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 993 Hüküm no: 808 Orijinal metin no: [185M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Mehmed’in vefat eden Duhâncı Ömer Beşe’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Velizâde Mehmed Efendi mahmiye-i İstanbul’da Zindankapısı kurbünde tüccâr tâifesinden fahrü’l-a‘yân el-Hâc Ali Ağa b. Veliyüddin’in sâkin olduğu mevzi‘a varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Kepenekçi Sinan mahallesinde sâkin tüccârdan hâfızü’l-kitâb el-Hâc Mehmed b. el-Hâc Ali meclis-i ma‘kūd-ı mezbûrda Küçükpazar kurbünde Hoca Hayreddin mahallesinde sâkin iken bundan akdem vefât eden Duhânî Ömer Beşe b. Hüseyin b. Veli’nin evlâd-ı sıgārı Fâtıma ve Ali ve Mustafa’nın tesviye-i emrlerine vasiye-i mansûbeleri ve vâlideleri Râbia bt. Mehmed b. Ahmed tarafından husûs-ı âti’l-beyânda bâ-hüccet-i şer‘iyye vekîl-i müsecceli olmağla terekesine vaz‘-ı yed eden merkūm el-Hâc Ali mahzarında üzerine da‘vâ ve takrîr-i kelâm edip müteveffâ-yı mezbûr Ömer Beşe b. Hüseyin b. Veliyüddin’e vukıyesi kırkar sağ akçeye olmak üzere yüz elli vukıye Kırcalı duhânımı elli guruşa mezbûr Ömer Beşe’ye bey‘ u teslîm ol dahi vech-i muharrer üzere yedimden iştirâ ve tesellüm ve kabz edip hattâ müteveffâ-yı mezbûr hâl-i hayâtında fevtinden altı ay mukaddem meblağ-ı mezbûr bana zimmetinde cihet-i merkūmeden vâcibü’l-edâ deyni olduğunu huzûr-ı Müslimînde ikrâr ve işhâd ettikden sonra meblağ-ı mezbûrun yirmi guruşunu hayâtında yedinden ahz u kabz edip bâkī otuz guruşu kable’l-edâ fevt olmağın terekesinden taleb ederim suâl olunsun dedikde gıbbe’s-suâl merkūm el-Hâc Ali Ağa cevâbında terekesine vech-i muharrer üzere vaz‘-ı yedini ikrâr ve deyn-i merkūmu inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Demirtaş mahallesinde sâkin Berber el-Hâc Mustafa b. Hüseyin ve Tavşantaşı kurbünde sâkin Hasan Ağa b. Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Duhânî Ömer Beşe b. Hüseyin b. Veliyüddin işbu müdde‘î-i mezbûr el-Hâc Mehmed b. el-Hâc Ali’ye yedinden iştirâ ve kabz eylediği vukıyesi kırkar sağ akçeye olmak üzere yüz elli vukıye Kırcalı duhânını elli guruşa iştirâ ve kabz etmekle meblağ-ı mezbûr zimetimde müdde‘î-i merkūm el-Hâc Mehmed’e vâcibü’l-edâ deynimdir deyü fevtinden altı ay mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle oldukdan sonra kabzına mu‘terif olduğu yirmi guruşdan mâ‘adâ otuz guruşu dahi hayâtında müteveffâ-yı mezbûrdan küllen ve ba‘zan ahz u kabz ve hîbe veyâ âhara havâle veyâ turuk-ı şer‘iyyeden bir tarîkle müteveffâ-yı mezbûrun zimmetini ibrâ eylemediğine müdde‘î-i mezbûra yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve el-Hâc Süleyman b. Hasan ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî evâhiri Cumâdelâhire sene 1110 Şuhûdü’l-hâl: el-Hâc Mehmed b. el-Hâc Mustafa, Hüseyin Çelebi b. Mustafa, Hasan Beşe b. Osman, el-Hâc Yusuf b. Abdullah, Ramazan Beşe b. Ahmed.