Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 994 Hüküm no: 809 Orijinal metin no: [185M/a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vefat eden eşi Ömer Beşe’de mehir alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘-i enverden me’zûnen irsâl olunan Mevlânâ Velizâde Mehmed Efendi mahmiye-i İstanbul’da Hoca Hayreddin mahallesinde sâkin iken bundan akdem vefât eden Duhânî Ömer Beşe b. Hüseyin’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde zâtı mahalle-i mezbûrede sâkin Abdurrahman Beşe b. Ahmed ve Hüseyin Çelebi b. Mustafa ta‘rîfleriyle mu‘arrefe olan hâzıfatü’l-vesîka müteveffânın zevce-i menkûha-i metrûkesi Râbia Hatun bt. Mehmed meclis-i ma‘kūd-ı mezkûrda müteveffâ-yı mezbûrun sagīre kızı Fâtıma ile sagīr oğulları Ali ve Mustafa’nın tesviye-i emrlerine tashîhan li’d-da‘vâ kıbel-i şer‘-i enverden vasî nasb olunan el-Hâc Ali Ağa b. Veliyüddin mahzarında üzerine da‘vâ ve takrîr-i kelâm edip mezbûr Ömer Beşe b. Hüseyin b. Veliyüddin tezevvüc murâd ettikde şuhûd mahzarında beni üç bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynimizde kāim iken kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden mu‘arrifân-ı mezbûrân Abdurrahman Beşe b. Ahmed ve Hüseyin Çelebi b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan işbu müdde‘iye-i mezbûre Râbia Hatun bt. Mehmed’i mezbûr Ömer Beşe b. Hüseyin b. Veliyüddin huzûrumuzda üç bin sağ akçe mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Abdullah ve el-Hâc Süleyman b. Hasan ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî evâhiri Cumâdelâhire sene 1110 Şuhûdü’l-hâl: el-Hâc Ebubekir Ağa b. İbrahim, Mehmed Çelebi b. Ahmed, el-Hâc Süleyman b. Ali, Ahmed Çelebi b. Muhyî Efendi, Mustafa Ağa b. Ali, el-Hâc Yusuf b. Abdullah.