Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 995 Hüküm no: 810 Orijinal metin no: [185M/a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Paşa’nın vefat eden Mehmed’deki alacağını terekeden teslim aldığı Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden bi’t-taleb me’zûnen irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Bahçekapısı dâhilinde Çelebioğlu mahallesinde umdetü’l-a‘yân makbûlü’s-sudûr ve’l-erkân el-Hâc Ahmed Ağa b. İbrahim’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde sâbıkā Mısr-ı Kāhire muhâfızı olup hâlâ Hanya muhâfazasına memûr olan düstûr-ı mükerrem müşîr-i müfahham devletlü vezîr-i rûşen-zamîr Hasan Paşa b. Mustafa Ağa b. Abdulkadir taraf-ı karînü’ş-şereflerinden husûs-ı âti’l-beyânda taleb ve da‘vâ ve sulh ve ibrâya vekîl olduğu mahalle-i mezbûrede Saraç İshak Paşa mahallesinde sâkin el-Hâc İbrahim Ağa b. Hamza ve Hocapaşa mahallesinde sâkin el-Hâc Süleyman b. Ali şehâdetleriyle mahzar-ı hasm-ı câhidde sâbit olup sübût-ı vekâletine hükm [185M/b] olunan kethüdâları mûmâ-ileyh el-Hâc Ahmed Ağa meclis-i ma‘kūd-ı mezbûrda mahmiye-i mezbûrede Samanveren mahallesi ahâlîsinden olup bundan akdem vefât eden el-Hâc Mehmed b. el-Hâc Hamuda’nın evlâd-ı sıgārı Mehmed ve Mustafa ve Hadîce ve Emine’nin tesviye-i emrlerine vasiyy-i muhtârları olmağla terekesine vaz‘-ı yed eden el-Hâc Ahmed b. Mehmed ile kebîr oğlu Ali Çelebi mahzarlarında üzerlerine bi’l-vekâle da‘vâ ve takrîr-i kelâm edip bin doksan sekiz senesinde müvekkilim paşa-i müşârün-ileyh hazretleri Masır vâlisi olup gider oldukda müteveffâ-yı mezbûr el-Hâc Mehmed b. el-Hâc Hamuda b. Mehmed Mısır’da vekîlim Hüseyin Hoca’ya beş bin guruş teslîm edin ben bunda taraf-ı Saltanat-ı aliyye’den verilmesi lâzım gelen yerlere zehâir alıvereyim demekle paşa-i müşârün-ileyh hazretleri dahi Mısır’a vardıkda malından emrine binâen vekîli mezbûr Hüseyin Hoca’ya beş bin guruş def‘ ve teslîm edip meblağ-ı mezbûr müteveffâ-yı mezbûr el-Hâc Mehmed’e vâsıl oldukdan sonra taraf-ı Saltanat-ı aliyye’den verilmesi lâzım gelen yerlere paşa-i müşârün-ileyhin emriyle meblağ-ı mezbûrun üç bin iki yüz otuz dokuz buçuk guruşuna zahîre alıp ber-mûceb-i defter mahallerine teslîm ettikden sonra bâkī bin yedi yüz altmış buçuk guruşu zimmetinde kalıp hattâ kemâl-i sıhhatinde fevtinden iki ay mukaddem cihet-i mezbûreden zimmetinde müvekkil-i müşârün-ileyh hazretlerine ol kadar guruş deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Saraç İshak mahallesi ahâlîsinden Ebubekir Ağa b. Abdurrahman ve mezbûr el-Hâc İbrahim Ağa b. Hamza li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. el-Hâc Hamuda b. Mehmed hâl-i kemâl-i sıhhatinde fevtinden iki ay mukaddem emrimle vekîlim Hüseyin Hoca’ya Mısır’da paşa-i müşârün-ileyh hazretlerinin teslîm eylediği beş bin guruş bana vâsıl olup meblağ-ı mezbûrun üç bin iki yüz otuz dokuz buçuk guruşuna paşa-i mûmâ-ileyhin emriyle zahîre alıp taraf-ı Saltanat-ı aliyye’den verilmesi lâzım <> olan yerlere verip bâkī bin yedi yüz altmış buçuk guruşu zimmetimde paşa-i müşârün-ileyhe deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın zikr olunan zehâir semeni olan üç bin iki yüz otuz dokuz buçuk guruşdan mâ‘adâ bin yedi yüz altmış buçuk guruşu mevkūfen alâ-yemînü’l-müvekkil terekeden edâya vasiyy-i mezbûra tenbîh olundukdan sonra vekîl-i mezbûr el-Hâc Ahmed Ağa meclis-i ma‘kūd-ı mezbûrda vasiyy-i mezbûr el-Hâc Ahmed mahzarında bi’l-vekâle ikrâr ve takrîr-i kelâm edip ânifen edâsına hükmolunan meblağ-ı merkūm bin yedi yüz altmış buçuk guruşu terekeden olmak üzere vasiyy-i mezbûr yedinden tamâmen alıp kabz edip müteveffâ-yı mezbûrun hîn-i fevtine gelince müvekkil-i müşârün-ileyh hazretleri ile beynlerinde cârî olan ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i da‘vâdan bi’l-vekâle müteveffâ-yı mezbûrun veresesinin zimmetlerini ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve İbrahim Çelebi b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 18 Recebi’l-ferd sene 1110 Şuhûdü’l-hâl: Umdetü’l-a‘yân el-Hâc Mustafa Ağa Mütevellî-i Vâlide Sultan, el-Hâc Süleyman Ebû Seyyid?, Ahmed Çelebi b. Abdullah, eş-Şeyh Mehmed b. Abdi, Süleyman Çelebi b. Sinan, Ahmed Çelebi b. Süleyman, el-Hâc Mehmed b. Ahmed.