Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 996 Hüküm no: 811 Orijinal metin no: [185M/b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Bey’in vefat eden Mehmed’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen Mevlânâ Ahmed Efendi b. el-merhûm Mehmed Efendi mahmiye-i İstanbul’da Rüstem Paşa Câmi‘-i şerîfi kurbünde Osman Çelebi’nin odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde hâlâ Bağdad vâlisi olan sa‘âdetlü Vezîr-i mükerrem İsmail Paşa hazretlerinin etbâ‘ından olup mahmiye-i mezbûrede Murad Paşa mahallesinde saray-ı âlîlerinde sâkin olan bâ‘isü’l-vesîka Ebubekir Bey b. Abdullah meclis-i ma‘kūd-ı mezbûrda mahmiye-i mezbûrede Samanveren mahallesi ahâlîsinden olup bundan akdem vefât eden el-Hâc Mehmed b. el-Hâc Hamuda b. Mehmed’in evlâd-ı sıgārı Mehmed ve Mustafa ve Hadîce ve Emine’nin tesviye-i emrlerine vasiyy-i muhtârları olmağla terekesine vaz‘-ı yed eden el-Hâc Ahmed b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mehmed b. el-Hâc Hamuda bin Mehmed’e bin doksan dokuz senesi Cumâdelûlâsı gurresinden malımdan huzûr-ı Müslimînde bin beş yüz guruş ikrâz ve teslîm ol dahi iktirâz ve kabz ve mesârifine sarfla istihlâk edip yedime mümzâ ve mahtûm ve mu‘anven ve mersûm târîh-i mezbûr ile müverrah işbu deyn temessüğünü verdikden sonra meblağ-ı mezbûrun altı yüz guruşunu Mısır’da vekîli Hüseyin Hoca’dan ahz u kabz edip bâkī dokuz yüz guruşunu kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Samanveren mahallesi sükkânından Süleyman Çelebi b. Sinan ve Mahmud Hoca b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka târîh-i mezbûrda müdde‘î-i mezbûr Ebubekir Bey müteveffâ-yı merkūm el-Hâc Mehmed b. Hamuda b. Mehmed’e huzûrumuzda malından bin beş yüz guruş ikrâz ve teslîm ol dahi iktirâz ve kabz ve mesârifine sarfla istilâk edip yedine işbu temessüğü verdi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl [185a] ve’t-tezkiye şehâdetleri makbûle olmağın kabzına mu‘terif olduğu altı yüz guruşdan mâ‘adâ müteveffâ-yı mezbûrun hayâtında küllen veyâ ba‘zan ahz u kabz veyâ hîbe ve âhara havâle yâhûd turuk-ı şer‘îden bir tarîk ile müteveffâ-yı mezbûrun zimmetini ibrâ eylemediğine müdde‘î-i mezbûra yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle meblağ-ı bâkī-i merkūm dokuz yüz guruşu terekeden edâya vasiyy-i mezbûra tenbîh eylediğini mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve İbrahim b. Hasan ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 20 min-Receb sene 1110 Şuhûdü’l-hâl: Ahmed Çelebi b. Abdullah, Uzun Ahmed Çelebi b. Süleyman, Osman Çelebi b. Hüseyin, Yusuf b. Abdullah, el-Hâc Süleyman Ebû Seyyid?