Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 999 Hüküm no: 813 Orijinal metin no: [185a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Çavuş’un varislerinin miras davalarında sulh oldukları Husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunan Mevlânâ es-Seyyid Abdülmuti Efendi işbu sene-i mübârekede hacc-ı şerîfden gelirken esnâ-i tarîkde Taputkorusu merhalesinde vefât eden sâdât-ı kirâm çavuşlarından es-Seyyid İbrahim Çavuş b. es-Seyyid Mehmed’in mahmiye-i İstanbul’da Beyceğiz mahallesinde sâkin olduğu vakıf menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘î şerîf eyledikde müteveffâ-yı mezbûrun verâseti zevce-i menkûha-i metrûkesi Kahraman Hatun bt. Abdullah ile li-ebeveyn kız karındaşı Şerife Karaman Hatun ve vilâyet-i Rumeli’nde Osmanpazarı kazâsına tâbi‘ Turuncular karyesinde sâkin li-ebin karındaşı es-Seyyid Himmet’e münhasıra olduğu şer‘an mütehakkık oldukdan sonra mezbûre Şerife Karaman Hatun’un oğlu ve tarafından husûs-ı âti’l-beyânda vekîl-i müsecceli olup ve gāib-i mezbûr es-Seyyid Himmet’in hüccet-i şer‘iyye ile mansûb vasîsi olan es-Seyyid Halil Çelebi b. es-Seyyid Burhan meclis-i ma‘kūd-ı mezbûrda müteveffâ-yı mezbûrun zevce-i metrûkesi mezbûre Kahraman Hatun mahzarında bi’l-vekâle ve bi’l-vesâye ikrâr ve takrîr-i kelâm edip bundan akdem mezbûre Kahraman Hatun’dan müteveffâ-yı mezbûrun işbu menzilinde mevcûd evânî-i nühâsiye [185b] ve mefrûşât ve nukūd-ı ma‘lûmesini ve sâir esâs-i beyti ketm ü ihfâ eyledin deyü taleb ve da‘vâ eylediğimde ol dahi cevâbında işbu meclisde mevcûd mecmû‘u iki yüz otuz beş guruşa muhammen melbûsât ve eşyâdan gayrı müteveffâ-yı mezbûr es-Seyyid İbrahim’in bende malı olmayıp hattâ hacc-ı şerîfe gider oldukda şuhûd mahzarında ikrâr ve nefy-i mülk eylemişdir deyü def‘le mukābele ve def‘-i mezbûrunu isbât içün şuhûd ikāmet etmekle beynimizde nizâ‘-ı küllî vukū‘undan sonra muslihûn tavassut edip mezbûre Kahraman Hatun eşyâ-i muhammene-i mezbûreden ve müteveffâ-yı mezbûrun hizmetinde olan es-Seyyid Halil yediyle tarîk-i hac ve Şam defterleri mûcebince gelen terekesinden ve nukūddan cem‘an işbu defter-i kassâm nâtık olduğu üzere ba‘de ihrâci’l-mehr ve’l-mesârif rub‘ hissesi olan yüz yirmi yedi guruşdan geçip rub‘ hissesi da‘vâsından mezbûrân Şerife Karaman Hatun ile es-Seyyid Himmet’in zimmetlerini ibrâ etmek üzere sulh oldukda sulh-ı mezbûr gāib-i merkūmun hakkında enfa‘ olmağla ben dahi sulh-ı mezbûru kabûl ve defter-i mezbûrda dâhil olan cümle tereke-i mezbûreyi ve irsen mezbûrân vâlidem Karaman Hatun ve dayım es-Seyyid Himmet içün ahz u kabz ettiğimden sonra mezbûre Kahraman Hatun husûs-ı mezbûra müte‘allıka âmme-i da‘vâdan mezbûrânın zimmetlerini ibrâ-i âmla ibrâ ve iskāt edip ben dahi hâric ez defter iddi‘â olunan tereke mütâlebesinden mezbûre Kahraman Hatun’un ve ma‘an sâkin işbu es-Seyyid Mustafa Çavuş b. es-Seyyid İbrahim’in zimmetlerini bi’l-vekâle ibrâ-i âmla ibrâ ve iskāt eyledim dedikde gıbbe’t-tesâduki’l-vicâhî vâki‘ hâli mevlânâ-yı mezbûr mahallinde tahrîr ve ma‘an ba‘s olunan Hasan Çelebi b. Abdi ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 11 min-Cumâdelûlâ sene 1110 Şuhûdü’l-hâl: Fahrü’l-eşbâh Kethüdâ Mehmed Efendi b. Hasan, Hüseyin Efendi el-İmâm, es-Seyyid Mehmed Çavuş b. Abdülkerim, es-Seyyid Bekir Çavuş b. es-Seyyid Mehmed, Müezzin Mehmed Çelebi b. Odabaşı, Mumcu İbrahim Beşe b. Hasan, Ali Beşe b. Ahmed, Hasan Çelebi b. Abdi, Mustafa Çelebi b. İbrahim.