Bab Mahkemesi 54 Numaralı Sicil (H. 1102 / M. 1691) cilt: 20, sayfa: 76 Hüküm no: 36 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avadik v. Haçador’un evini Emin Nureddin Vakfı’na bey‘ bi’l-istiğlâl yoluyla satması Mahmiye-i İstanbul’da Abdi Subaşı mahallesi sükkânından Avadik v. Haçador nâm Ermeni meclis-i şer‘-i şerîf-i enverde, merkūm Emîn Nureddin Vakfı’na bi’l-fi‘il mütevellî olan işbu râfi‘ü’l-kitâb umdetü’l-eşbâh ve’l-a‘yân Abdurrahim Ağa b. Mehmed mahzarında ikrâr ve takrîr-i kelâm edip, silk-i mülkümde münselik olup, mahalle-i mezbûrede vâki‘ bir tarafı Safiye Hâtun Vakfı’ndan olup kendi tasarrufunda olan vakıf menzil ve bir tarafı Bahritaniyesi menzili ve bir [tara]fı Perveşe mülkü ve bir tarafı tarîk-i âm ile mahdûd fevkānî ve tahtânî sekiz bâb oda ve avlu ve sofa ve kenîfi müştemil olup, babamdan mevrûs mülk menzilimi, bi cümleti’t-tevâbi‘ ve’l-levâhık mütevellî-i mezbûre yüz esedî guruşa bi tarîki’l-istiğlâl bey‘ ve teslîm, ol dahi mâl-ı vakf-ı mezbûru bi’t-tevliye iştirâ ve kabûl ve tesellüm edip, semeni olan meblağ-ı mezbûru mukaddemâ mezbûr Abdurrahim Ağa’dan asl-ı mâl-ı vakf-ı mezbûrdan istidâne ve kabz eylediğim yüz esedî guruş deynine takās, ol dahi mukāssa ve kabûl edip, yine mütevellî-i mezbûr menzil-i mezkûru ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on beş esedî guruş ücret ile bana îcâr ve teslîm, ben dahi istîcâr ve kabûl ve kabz eyledim dedikde, gıbbe’t-tasdîki’ş-şer‘î asl-ı vakf-ı mezbûr yüz guruş ve menzil-i mezbûrun derkine ve ücret-i lâzımesine mukırr-ı mezbûrun hemşîrezâdesi Abro v. Moses emr-i kabûlü hâviye kefâlet-i sahîha ile kefîl olmağın, mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Efendi b. Mustafa, Mustafa Çelebi b. el-Hâc Mustafa, Himmet Efendi b. Mustafa, Ali Efendi b. Sunullah, Ziyaeddin Efendi b. Ahmed.