Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1005 Hüküm no: 818 Orijinal metin no: [186b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın vefat eden Hüseyin Ağa’nın çocuklarının vasisi olduğunu ispat ettiği Kezâlik akd-i meclis-i şer‘-i şerîf eyledikde müteveffâ-yı mezbûrun dâmadı olup vasiyy-i muhtârı olduğunu iddi‘â eden işbu râfi‘ü’l-vesîka Süleyman Ağa b. el-Hâc Ömer meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve terekesine vâzı‘atü’l-yed olup zâtı İmâm Mehmed Efendi b. Receb ve el-Hâc Yahya b. Hüseyin ta‘rîfleriyle mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Ağa b. Kasım b. Receb kasaba-i mezbûrede hâl-i marazında fevtinden bir ay mukaddem sagīr oğulları İbrahim ve Ali’nin vakt-i rüşd ü sedâdlarına varınca tesviye-i emrlerine kabûlüme mevkūf vesâyet ile huzûr-ı Müslimînde beni vasiyy-i muhtâr nasb ü ta‘yîn edip musırran-aleyhâ vefât ettikde haber-i vesâyet bana bâliğ oldukda ben dahi kabûl edip hisse-i şer‘iyyelerini ahz murâd eylediğimde mezbûre Hadîce mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Molla Şeref mahallesi ahâlîsinden olup müteveffâ-yı mezbûr ile ma‘an kasaba-i mezbûrede olan fahrü’l-a‘yân el-Hâc Şahin Ağa b. Sinan ve Halil Ağa b. Abdullah li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-vâki‘ müteveffâ-yı mezbûr Hüseyin Ağa b. Kasım b. Receb hâl-i marazında fevtinden bir ay mukaddem huzûrumuzda işbu müdde‘î-i mezbûr Süleyman Ağa b. el-Hâc Ömer’i sagīr oğulları İbrahim ve Ali’nin vakt-i rüşd ü sedâdlarına varınca tesviye-i emrlerine kabûlüne mevkūfe vesâyet ile vasiyy-i muhtâr nasb ü ta‘yîn ve musırran-aleyhâ vefât ettikde haber-i vesâyet mezbûr Süleyman Ağa’ya bâliğ oldukda kabûl eyledi hâlâ merkūm Süleyman Ağa müteveffâ-yı mezbûrun vasiyy-i muhtârıdır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl [187a] ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr kezâlik inhâ ve takrîr etmeğin mâ-vaka‘a kayd-şüd. Fî 15 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.