Bab Mahkemesi 54 Numaralı Sicil (H. 1102 / M. 1691) cilt: 20, sayfa: 76 Hüküm no: 37 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Muhyiddin mahallesi avarız ve taâmiye vakfı parasının yeni mütevelliye teslim edilmesi Mahmiye-i İstanbul’da Edirnekapısı kurbunda el-Hâc Muhyiddin mahallesi avârızı ve ta‘âmiyesi için mevkūfe nukūda bi’l-fi‘il mütevellîsi olan Hüseyin Çelebi b. Muharrem meclis-i şer‘-i şerîf-i enverde, vakf-ı mezbûre sâbıkan mütevellî olan Buhurî Ahmed Çelebi b. Mustafa mahzarında üzerine da‘vâ ve takrîr-i kelâm edip, mezbûr Ahmed Çelebi zamân-ı tevliyetinde üç yüz guruş avârız vakfı ve yüz guruş ta‘âmiye vakfı cem‘an dört yüz guruş mâl-ı vakf-ı mezbûr makbûzu olup, hattâ bundan akdem mezbûr Ahmed Çelebi avârız vakfı olan üç yüz guruş ta‘âmiye vakfı olan yüz guruş cem‘an dört yüz guruşu mâl-ı vakf-ı mezbûr bendedir deyu şuhûd mahzarlarında ikrâr ve i‘tirâf dahi etmeğin, hâlâ teslîmden imtinâ‘ eder, suâl olunup, mâl-ı vakf olan meblağ-ı mezbûr dört yüz guruşu tevliyetim hasebiyle bana teslîme tenbîh olunmak matlûbumdur dedikde, gıbbe’s-suâl mezbûr Ahmed Çelebi cevâbında, ben vakf-ı mezbûra mütevellî olduğumda mâl-ı vakf-ı mezbûrun cümlesi zimem-i nâsda olmağla aslâ bir nesne kabz etmedim. Cümlesi zimemde olmak üzre kabûl etmişdim ve hâlâ mâl-ı vakf-ı mezbûr zimem-i nâsdadır, makbûzum olmamışdır deyücek, müdde‘î-i mezbûrdan sıdk-ı makāline beyyine taleb olundukda, mahalle-i mezbûr sükkânından Durmuş Beşe b. Ramazan ve Yusuf Beşe b. Abdullah ve Ahmed Beşe b. Ali ve Mehmed Çelebi b. Mustafa ve Mustafa Çelebi b. Muharrem nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ bundan akdem mütevellî-i sâbık mezbûr Ahmed Çelebi avârız vakfı olan üç yüz guruş ve ta‘âmiye vakfı olan yüz guruş, cem‘an dört yüz guruşu mâl-ı vakf-ı mezbûr bendedir deyu bizim huzûrumuzda ikrâr ve bizi istişhâd eyledi. Biz bu husûsa bu vech üzre şâhidleriz, şehâdet dahi ederiz deyu her biri istişhâd-ı şer‘iyye ettiklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebiyle mâl-ı vakf olan meblağ-ı mezbûr dört yüz guruşu mütevellî-i mezbûr Hüseyin Çelebi’ye teslîme mütevellî-i sâbık mezbûr Ahmed Çelebi’ye ba‘de’t-tenbîh, mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Fahrü’l-e’imme Ahmed Efendi el-imâm, Mehmed Efendi el-hatîb, Mustafa Efendi b. Ahmed, el-Hâc Ali Ağa b. Abdurrahman, el-Hâc Hüseyin Berber.