Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1012 Hüküm no: 826 Orijinal metin no: [188a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hüseyin Efendi’nin kızı ile bakıcısına nafaka tayin edildiği Mahmiye-i İstanbul’da Kalenderhane mahallesi sükkânından olup işbu sene-i mübârekede hacc-ı şerîfe giderken medîne-i Mısr’da vefât eden Mevkūfât hulefâsından merhûm Hüseyin Efendi b. Hasan b. Abdullah’ın sagīre kızı Fâtıma’nın li-ümmin ceddi ve tesviye-i umûruna taraf-ı şer‘den mansûb vasîsi olan umdetü’l-emâcid ve’l-a‘yân Mehmed Bey b. el-Vezîr el-merhûm Siyavuş Paşa meclis-i şer‘-i hatîr <<-i lâzım>>de takrîr-i kelâm ve ta‘bîr ani’l-merâm edip sagīre-i mezbûre mal-ı mevrûsundan nafaka ve kisve-bahâya muhtâc olmağın kendüye ve hâdimesine kadr-ı ma‘rûf takdîr olunmak matlûbumdur dedikde ba‘de’l-istihbâri’ş-şer‘î hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīre-i mezbûre Fâtıma’nın ve hâdinesinin nafaka ve kisvelerine ve sâir levâzım-ı mühimmelerine mal-ı müntakilinden beher yevm elli sağ akçe farz ve takdîr edip meblağ-ı mefrûz-ı mezbûr yevmî elli sağ akçeyi sagīre-i mezbûre ve hâdimesinin nafaka ve sâir havâic-i zarûriyelerine harc ü sarfa ve lede’l-iktizâ istidâneye ve hîn-i zaferde malına rücû‘a vasiyy-i mûmâ-ileyhe izin dahi verilmeğin mâ-vaka‘a kayd-şüd. Fî 18 min-Receb sene 1110 Şuhûdü’l-hâl: Fahrü’l-eşbâh Abdurrahim Bey b. Abdülbaki Bey, Abdüllatif Bey b. Bâkī Bey, el-Hâc Süleyman b. Mehmed Çukadâr, İbrahim Çelebi b. Ahmed, Mehmed Efendi b. Sadık, Mehmed Efendi Pîrîzâde, Mehmed Ağa b. Kehhâlzâde