Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1013 Hüküm no: 828 Orijinal metin no: [188b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin Efendi’nin Tüccar Osman Ağa’daki emanet sandığının varislerince teslim alındığı Husûs-ı âti’l-beyânın mahallinde tahrîri iltimâs olunmağın savb-ı şer‘-i münîrden irsâl olunan Mevlânâ es-Seyyid Abdülmuti Efendi mahmiye-i İstanbul’da Vâlidehanı’nda sâkin tüccâr-ı zevi’l-i‘tibârdan el-Hâc Osman Ağa b. el-Hâc Mustafa’nın odasına varıp zeyl-i kitâbda muharrerü’l-esâmî udûl-ı muvahhidîn ve sikāt-ı Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Kalenderhane mahallesi sükkânından olup işbu sene-i mübârekede hacc-ı şerîfe giderken medîne-i Mısır’da vefât eden Mevkūfât hulefâsından Nüzûl kâtibi Hüseyin Efendi b. Hasan [b.] Abdullah’ın verâseti zevce-i metrûkesi zahrü’l-muvakkarât Hümaşah Hatun bt. Mehmed Bey’e ve mezbûre batnında müstebîn hamle ve sagīre kızı Fâtıma’ya münhasıra olduğu şer‘an mütehakkık oldukdan sonra mezbûre Hümaşah Hatun’un babası ve tarafından hüküm hücceti mûcebince vekîl-i müsecceli olup ve haml-i mezbûr ile sagīre-i mezbûre Fâtıma’nın tesviye-i emrlerine kezâlik hüccet-i şer‘iyye ile mansûb vasîleri olan umdetü’l-emâcid ve’l-a‘yân mûmâ-ileyh Mehmed Bey b. el-Vezîr el-merhûm Siyavuş Paşa meclis-i ma‘kūd-ı mezbûrda işbu bâ‘isü’l-kitâb mezbûr el-Hâc Osman mahzarında ikrâr-ı tâm ve takrîr-i kelâm edip dâmadım müteveffâ-yı mezbûr Hüseyin Efendi hayâtında işbu mukaffel ve mahtûm bir sagīr sepet sandığını mezbûr el-Hâc Osman Ağa’ya îdâ‘ ve teslîm ol dahi istîdâ‘ ve kabz edip ve yedinde iken mezbûr Hüseyin Efendi vefât etmekle vedî‘a-i mezbûre bi-hasebi’l-irs verese-i merkūmûna isâbet ve intikāl etmeğin el-hâletü hâzihi vedî‘a-i mezbûreyi mûdi‘-i mezbûrdan taleb ve da‘vâ ve ba‘de’l-isbât teslîmine hükm-i şer‘î lâhık ve yedime işbu hüküm hücceti verilmekle hâlâ sandık-ı mezbûr işbu meclisde feth olundukda içinde mevcûd bulunan bir beyâz kesede üç yüz otuz iki şerîfî ve yedi yüz on yedi yaldız ve yüz yirmi üç macarî ki cem‘an bin yüz yetmiş iki aded altını ve iki beyâz kesede yirmi dokuz bin dört yüz Mısrî parayı ve ba‘zı defâtir ve evrâk-ı perîşânı sandıklarıyla ma‘an mûda‘-i mezbûr el-Hâc Osman işbu meclisde bana def‘ u teslîm ben dahi vesâyet ve vekâletim hasebiyle meblağayn-ı mezbûreyn bin yüz yetmiş iki altını ve yirmi dokuz bin dört yüz parayı ve bulunan defâtir ve evrâkı ve üç yüz guruşluk havâle mektûbunu mezbûr el-Hâc Osman Ağa yedinden tamâmen ahz u kabz eyledim min-ba‘d sepet-i mezbûrda bulunan nukūd-ı mezkûre ve evrâk cümlesi makbûzum olup nukūd-ı mezbûrdan merkūm el-Hâc Osman yedinde bir nesne bâkī kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Mehmed ve İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 18 min-Receb sene 1110 Şuhûdü’l-hâl: Eş-şâhidûnü’s-sâbikûn.