Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1014 Hüküm no: 829 Orijinal metin no: [188b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Elmas Mehmed Paşa’nın sarayının müştemilatıyla birlikte validesi Havva Hatun’a satıldığı Hilâl-i sütûrda mersûm olan husûsun mahallinde ketb ü tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Ahmed Şemsi Efendi mahmiye-i İstanbul’da Emin Sinan mahallesi ahâlîsinden fahrü’l-emâsil ve’l-akrân İbrahim Bey b. Abdurrahman Ağa’nın menziline varıp zeyl-i rakīmde merkūmü’l-esâmî Müslimîn huzûrlarında akd-i meclis-i şer‘-i mübîn ettikde asrında sadrazam olup bin yüz dokuz senesinde vâki‘ sefer-i hümâyûnda Zente nâm mevzi‘de Nemçe taburu muhârebesinde şehîden vedâ‘-ı âlem-i fânî eden Elmas Mehmed Paşa’nın düyûnu terekesinden ezyed olmağla tesviye-i umûruna cânib-i şer‘den vasî ve kayyım nasb olunan merhûm-ı müşârün-ileyhin etbâ‘ından Telhîsî Abdullah Ağa b. Mehmed meclis-i ma‘kūd-ı mezbûrda merhûm-ı müşârün-ileyhin vâlideleri fahrü’l-muhadderât Havva Hatun bt. Abdullah b. Abdurrahim taraflarından ikrâr-ı âti’z-ziki tasdîka vekîl olduğu zât-ı mûmâ-ileyhâyı ma‘rifet-i şer‘iyye ile ârifân olan İsmail Efendi ve Osman Bey ibney el-merhûm Mustafa Paşa şehâdetleriyle sâbit olan mûmâ-ileyh İbrahim Bey b. Abdurrahman mahzarında bi’l-vesâye ikrâr ve takrîr-i kelâm edip merhûm-ı müşârün-ileyhin ile’l-vefât mülk ve hakkı olup zikr olunan Emin Sinan mahallesi ile Dîvâne Ali mahallesinde vâki‘ bir tarafdan İbrahim Halîfe menzili ve ba‘zan Kavukçu İbrahim Çelebi bahçesi ve ba‘zan Osman Efendizâde Ahmed Efendi arsası ve ba‘zan Halil Efendi mülkü ve ba‘zan Esirci el-Hâc İsa mülkü ve ba‘zan tarîk-i hâs ve ba‘zan merhûm-ı müşârün-ileyhin veresesi tasarrufunda olan vakıf menzil ve ba‘zan Ahmed Bey tasarrufundan olan vakıf menzil ve ba‘zan Gedikpaşa hamamcısı Hüseyin Çelebi tasarrufunda olan vakıf menzil ve ba‘zan yine Gedikpaşa imâmına meşrûta vakıf menzil ve üç tarafı tarîk-i âm ile mahdûd sarayın dâhilinde beş bâb müteehhilîn odaları ve merhûm Durak Mehmed Çelebi Vakfı’ndan olup senede üç yüz altmış akçe mukāta‘a-i zemîni olup binâsı mülk olan iki bâb fevkānî kârgîr oda ve tahtında mahzen ve eşcâr-ı müsmire ve gayr-ı müsmire hadîkayı ve Gedik Nasuh Vakfı’ndan senede beş yüz akçe mukāta‘a-i zemîni olup beş yüz zirâ‘ arsanın üzerinde mağrûs eşcâr-ı müsmire ve gayr-ı müsmire ile bir mikdâr enkāz-ı ma‘lûmeyi ve el-Hâc Hızır ve Meş‘alci Hasan Bey ve sürûrî(?) nâm hatun vakıflarından senede sekiz yüz kırk akçe mukāta‘a-i zemîni olup arsasının üzerine gars olunan eşcâr-ı müsmire ile bir mikdâr enkāz-ı ma‘lûmeyi ve kanavât ile muhrez olup Ramazan Efendi vereselerinden merhûm-ı müşârün-ileyhin iştirâ eylediği bir buçuk masura mâ’-i muhrezeyi ve iki yüz on zirâ‘ mülk arsa-i hâliyeyi münâdîlerden Hasan Çelebi b. Mehmed yediyle sûk-ı sultânîde on beş gün nidâ ve müzâyede olunup rağabât-ı nâs bi’l-külliye münkatı‘a oldukdan sonra müvekkile-i mûmâ-ileyhâ üzerinde bin iki yüz guruşda karâr edip ve meblağ-ı mezbûr el-yevm mebî‘-i mezkûrun semen-i misli olduğu zeyl-i kitâbda muharrerü’l-esâmî sikāt-ı muvahhidîn ihbârlarıyla zâhir olmağla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin müvekkile-i mûmâ-ileyhâya bin iki yüz guruşa bey‘ u teslîm onlar [ol] dahi iştirâ ve tesellüm ve kabz u kabûl ettikden sonra semeni olan meblağ-ı mezbûr bin iki yüz guruşu müvekkile-i mûmâ-ileyhâ yedinden vesâyet-i mahkiyem hasebiyle bi’t-tamâm ahz u kabz eyleyip ba‘de’l-yevm mebî‘-i mahdûd-ı mezkûr müvekkile-i mûmâ-ileyhânın mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Muhzır Ahmed Çelebi b. Süleyman ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî selhi min-Cumâdelâhire sene 1110 Şuhûdü’l-hâl: Ahmed Efendi b. Mustafa İmâm-ı Sâlis-i Sultan Selim, Sunullah Efendi b. Osman el-Kādı, Kavukçu el-Hâc Ali [b.] Mustafa Çelebi, Mehmed Efendi b. Ali, Hasan Ağa b. Mustafa, Mustafa Efendi b. Mehmed, İbrahim Bey b. Mehmed, Ebubekir Ağa, Abdullah Bey b. Resul, Hasan Bey b. Abdullah, Şatırbaşı Ahmed Bey b. Halil.