Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1015 Hüküm no: 830 Orijinal metin no: [189a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Efendi’nin Dergâh-ı âlî Yeniçerileri Doksan Bir Cemaati Para Vakfı’na olan borcunun terekeden ödenmesi Dergâh-ı âlî -dâme mahfûfen bi’l-me‘âlî- yeniçerilerinin doksan bir cemâ‘at odası mühimmâtına mevkūfe nukūda bi’l-fi‘il mütevellî olan işbu bâ‘isü’l-kitâb Hasan Ağa b. Mustafa mahfil-i kazâda mahrûse-i Edirne’de müsâfiren sâkin iken bundan akdem vefât eden Balizâde demekle şehîr Mehmed Efendi b. Habib Efendi’nin sagīr oğulları Mehmed Said ve Mehmed Reşid’in tesviye-i emrlerine kıbel-i şer‘den mansûb vasîleri mefharü’l-kuzât Nimetullah Efendi b. el-Hâc Mehmed Efendi tarafından husûs-ı âti’l-beyânda vekîl olduğu merhûm-ı mezbûrun etbâ‘ından Yusuf Çelebi b. Abdullah ve Mustafa Beşe b. Ahmed şehâdetleriyle mahzar-ı hasm-ı câhidde şer‘an sâbit ve sübût-ı vekâletine hüküm olunan karındaşı Ahmed Çelebi b. Abdurrahman mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Balizâde Mehmed Efendi b. Habib Efendi’nin hatt ü hatmini hâvî ve bin yüz yedi senesi Rebî‘ülevvel[e] gurresi târîhiyle müverrah işbu yedimde olan deyn temessüğü mûcebince mal-ı vakf-ı mezbûrdan benim yedimden yüz yirmi guruş istidâne ve kabz edip mukābelesinde eşyâ-i memlûkesinden işbu bir cild Kuhistânî(?) ve bir Dürer ve bir Ahî Çelebi ve dört zirâ‘ mâî hâre ve bir rûznâmeli sâ‘at ve bir yüz aded mercan tesbîh ve bir sîm reşmeli bakır kemer-i raht ve bir hâric abayî ve üç ayak bir çift zümrüd küpe ve on beş aded inci düğme ve kılâbdânlı bir kesesini bana rehin vaz‘ u teslîm ben dahi irtihân ve kabz u kabûl eylediğimden sonra meblağ-ı merkūmu kable’l-edâ ve’l-fek fevt olmağın vekîl-i mezbûrdan suâl olunup edâ-i deyn ve fekk-i rehne tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden merhûm-ı mezbûrun etbâ‘ından mezbûr Yusuf Çelebi b. Abdullah ve İsmail Çelebi b. Davud li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hatt ü hatmini hâvî ve bin yüz yedi Rebî‘ülevveli gurresi târîhiyle müverrah işbu deyn temessüğü mûcebince mal-ı vakf-ı mezbûrdan mütevellîsi işbu müdde‘î-i mezbûr yedinden huzûrumuzda yüz yirmi guruş istidâne ve kabz edip mukābelesinde eşyâ-i memlûkesinden işbu bir cild Kuhistânî(?) ve bir Dürer ve bir Ahî Çelebi ve bir dört zirâ‘ mâî hâre ve bir rûznâmeli sâ‘at ve yüz aded bir mercan tesbîh ve bir sîm rişmeli bakır kemer-i raht ve bir hâric abayî ve üç ayak zümrüd küpe ve on beş aded incili düğme ve kılâbdânlı bir kesesini mütevellî-i mezbûr yedinde rehin ve teslîm ol dahi ber-vech-i muharrer irtihân ve kabz u kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: İbrahim Çelebi b. Mehmed, Mehmed Efendi, Murad Beşe b. Hüseyin Ağa, Ahmed Efendi Şeyhzâde, Ahmed Çelebi b. Süleyman, Hasan Çelebi b. Abdullah, Salih Çelebi b. Yusuf