Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1016 Hüküm no: 831 Orijinal metin no: [189a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in yine vefat eden Balizade Mehmed Efendi’deki alacağının kefili Ahmed Çelebi’den tahsili Yoros kazâsına tâbi‘ Aşçılar nâm karyede sâkin iken bundan akdem vefât eden Mehmed’in evlâd-ı sıgārı İsmihan ve Safiye ve Mustafa’nın vasiyy-i mansûbları olup mahmiye-i İstanbul’da Beyceğiz mahallesinde sâkin bâ‘isü’l-kitâb Ali Efendi b. Şa‘bân mahfil-i kazâda mahmiye-i mezbûrede Karagümrük kurbünde Dâye Hatun mahallesi sükkânından olup mahrûse-i Edirne’de müsâfiren sâkin iken bundan akdem vefât eden Balizâde demekle şehîr Mehmed Efendi b. Habib Efendi’nin sagīr oğulları Mehmed Said ve Mehmed Reşid’in tesviye-i emrlerine kıbel-i şer‘den mansûb vasîleri fahrü’l-kuzât Nimetullah Efendi b. el-Hâc Mehmed Efendi b. Balizâde Efendi tarafından husûs-ı âti’l-beyânda vekîl olduğu merhûm-ı mezbûrun etbâ‘ından Yusuf Çelebi b. Abdullah ve Mustafa b. Ahmed şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükmolunan Ahmed Çelebi b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Balizâde Mehmed Efendi b. Habib Efendi hayâtında bin yüz sekiz senesi Muharremi’nin on beşinci günü işbu yedimde olan deyn temessüğü nâtık olduğu üzere zikr olunan sagīrlerin mallarından benim yedimden yüz yirmi beş guruş istidâne ve kabz edip mukābelesinde işbu bir mermer Beç? kâsesi ve bir Habib ismine hâtem ve bir Mültekā ve bir Çivizâde Fetvâsı ve Tashîh-i Kudûrî ve bir Yahya Efendi Fetvâsı ve bir Sadrü’ş-şerî‘a ve masnû‘ on altı vukıye bakır ve bir kürdî sarık ve bir köhne şal kuşak ve iki şerbet makramasını bana rehin vaz‘ ve teslîm ben dahi ba‘de’l-kabz ve’l-kabûl meblağ-ı merkūma karındaşı işbu mezbûr Ahmed Çelebi tarafeynden emr ü kabûlü hâviye kefâlet-i sahîha-i şer‘iyye ile kefîl bi’l-mâl oldukdan sonra meblağ-ı merkūmun on guruşunu müteveffâ-yı mezbûr yedinden ahz ü istîfâ edip bâkī yüz on beş guruşu kable’l-edâ ve’l-fek fevt olmağla suâl olunup edâ-i deyn ve fekk-i rehne ve rihân-ı mezkûre semenlerinden mâ‘adâ bâkī kalan meblağ-ı mezbûr Ahmed Çelebi’ye kefâletine binâen edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Beyceğiz mahallesinde sâkin İmâm Hüseyin Efendi b. Mustafa ve Mehmed Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hayâtında işbu deyn temessüğü nâtık olduğu üzere bin yüz sekiz senesi Muharremi’nin on beşinci günü zikr olunan sagīrlerin mallarından huzûrumuzda işbu müdde‘î-i mezbûr yedinden yüz yirmi beş guruş istidâne ve kabz edip mukābelesinde işbu bir mermer Beç? kâsesi ve bir Habib ismine hâtem ve bir Mültekā ve bir Çivizâde Fetvâsı ve Tashîh-i Kudûrî ve bir Yahya Efendi Fetvâsı ve bir Sadrü’ş-şerî‘a ve masnû‘ on altı vukıye bakır ve bir kürdî destâr ve bir köhne şal kuşak ve iki şerbet makramasını müdde‘î-i mezbûr yedine rehin vaz‘ ve teslîm ol dahi ba‘de’l-kabz ve’l-kabûl meblağ-ı merkūma tarafeynden [189b] emr ü kabûlü hâviye kefâlet-i sahîha-i şer‘iyye [ile] karındaşı işbu mezbûr Ahmed Çelebi kefîl bi’l-mâl oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 12 min-Receb sene 1110 Şuhûdü’l-hâl: Mukayyid Mustafa Efendi [b.] Mehmed, es-Seyyid Abdülmuti Efendi, es-Seyyid Abdullah Efendi, Hâfız Mehmed Efendi, Murad Efendi b. Hüseyin Ağa, Hasan Çelebi b. Abdullah.