Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1017 Hüküm no: 832 Orijinal metin no: [189b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Elmas Mehmed Paşa’nın çiftliğinin müştemilatıyla birlikte validesi Havva Hatun’a satıldığı Husûs-ı âti’l-beyânın mahallinde ketb ü tahrîri iltimâs olunmağın cânib-i şerî‘at-i garrâdan me’zûnen irsâl olunan Mevlânâ Ahmed Şemsi(?) Efendi mahmiye-i İstanbul’da [Emin] Sinan mahallesi ahâlîsinden fahrü’l-emâsil ve’l-akrân İbrahim Bey b. Abdurrahman Ağa’nın menziline varıp zeyl-i kitâbda mersûmü’l-esâmî Müslimîn huzûrlarında akd-i meclis-i şer‘-i kavîm ettikde asrında sadrazam olup bin yüz dokuz senesinde vâki‘ sefer-i hümâyûnda Zente nâm mevzi‘de Nemçe taburu muhârebesinde şehîd[en] vedâ‘-ı âlem-i fânî eden Elmas Mehmed Paşa b. Abdurrahman Ağa’nın düyûnu terekesinden ezyed olmağla tesviye-i umûruna kıbel-i şer‘-i enverden vasî ve kayyım nasb olunan merhûm-ı müşârün-ileyhin etbâ‘ından Telhîsî Abdullah Ağa b. Mehmed meclis-i ma‘kūd-ı mezbûrda merhûm-ı müşârün-ileyhin vâlideleri fahrü’l-muhadderât Havva Hatun bt. Abdullah b. Abdullah’ın (Abdurrahim’in) zâtı ba‘de’t-ta‘rîfi’ş-şer‘î taraflarından bey‘-i âti’l-beyânı tasdîka vekîl-i müseccelleri mûmâ-ileyh İbrahim Bey b. Abdurrahman Ağa mahzarında bi’l-vesâye ikrâr ve takrîr-i kelâm edip merhûm-ı müşârün-ileyhin ile’l-vefât eşyâ-i memlûkesinden olup Havâss-ı Refî‘a kazâsına tâbi‘ Ayamama nâm mahalde vâki‘ çiftlik ta‘bîr olunur vakıf menzili dâhilinde der-anbâr olan iki yüz keyl hınta ve yetmiş keyl şa‘îr ve otuz keyl buğday ve yüz keyl fî ve yüz keyl burçak ve üç yüz keyl alef ve beş yüz kantar saman ve bir re’s gulâm ve bir re’s câriye ve dört re’s su sığırı ve altı re’s kara sığır ve on dört re’s kara sığır ineği ve altı re’s buzağı dört re’s camus ineği ve dört re’s buzağı ve üç re’s kara sığır buzağı ve bir re’s kısrak ve iki re’s tay ve altı aded saban demiri ve bir kebîr saban ve bir hurşine? sûk-ı sultânîde ba‘de’l-müzâyede ve ınkıtâ[‘]ı’r-rağbe beş yüz guruşda müvekkile-i mûmâ-ileyhâ üzerinde karâr edip ve meblağ-ı mezbûr mebî‘-i mezkûrun el-yevm semen-i misli olduğunu zeyl-i sütûrda merkūmü’l-esâmî sikāt-ı muvahhidîn ihbârlarıyla zâhir olmağla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkile-i mûmâ-ileyhâ Havva Hatun’a bi-safkatin vâhidetin beş yüz guruşa bey‘ ol dahi iştirâ edip mebî‘-i mezkûru mahallinde kabzına müvekkile-i mûmâ-ileyhâyı taslît eyledikden sonra semeni olan meblağ-ı mezbûr beş yüz guruşu müvekkile-i mûmâ-ileyhâ yedinden bi’t-tamâm vesâyet-i mahkiyem hasebiyle ahz u kabz eyledim ba‘de’l-yevm mebî‘-i mezkûr müvekkile-i mûmâ-ileyhânın mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Ahmed Çelebi b. Süleyman ile meclis-i şer‘a gelip takrîr etmeğin mâ-vaka‘a kayd-şüd. Fî 29 Cumâdelâhire sene 1110 Şuhûdü’l-hâl: Ahmed Efendi b. Mustafa İmâm-ı Sâlis-i Sultan Selim, Sunullah Efendi b. Osman, Mustafa Efendi b. Mahmud İmâm, İsmail Efendi b. Mustafa Paşa, Osman [Bey] b. Mustafa Paşa.