Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1018 Hüküm no: 833 Orijinal metin no: [189b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülbuy Hatun’un eşi Kapıcı Ali Bey’in terekesinden eşya saklamadığı Mahmiye-i İstanbul’da İshak Paşa mahallesinde sâkin iken bundan akdem vefât eden Kapıcı Ali Bey b. Abdullah’ın verâseti zevce-i menkûha-i metrûkesi Gülbuy Hatun bt. Abdullah ile sulbî sagīr oğlu İsmail ve sagīre kızları Hadîce ve Fâtıma’ya münhasıra ve tashîh-i meselesi otuz iki sehmden olmağla sihâm-ı mezbûrenin dört sehmi zevcesi mezbûre Gülbuy Hatun’a ve on dört sehmi mezbûr İsmail’e ve yedişer sehmi mezbûretân Hadîce ve Fâtıma’dan her birine isâbeti tahakkukundan sonra sagīre-i mezbûre Fâtıma’nın vasiye-i muhtâresi ve min-kıbeli’l-ümm ceddesi olan Âişe Hatun bt. Abdullah ba‘de’t-ta‘rîfi’ş-şer‘î meclis-i şer‘-i hatîr-ı lâzımü’t-tevkīrde mezbûre Gülbuy Hatun bt. Abdullah b. Abdullah tarafından husûs-ı âti’l-beyânda husûmet ve redd-i cevâba vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Ahmed Efendi b. Ali ve Mustafa Çelebi b. <> Mustafa şehâdetleriyle mahzar-ı hasm-ı câhidde sâbit olup sübût-ı vekâletine hükmolunan hâfızü’l-kitâb Mustafa Efendi b. Ali mahzarında bi’l-vesâye üzerine da‘vâ ve takrîr-i kelâm edip tereke-i müteveffâ-yı mezbûrdan hâric ez defter kassâm-ı askerî mecmû‘u yirmi guruş kıymetli yeşil çuka kaplı üç kürk ve altı tencere ve yeşil çuka bir kerrâke ve bir sîm hançer ma‘a bıçak ve bir yeşil kapama ve bir siyâh kapama ve bir gövez dolama ve iki yorgan ve iki beledî yastık ve bir beledî döşek ve bir Yanbolu kebesi ve bir kilim ve bir sini ve altı sahan ve bir el ibriği ve bir tâbe [190a] ve üç kırmızı çuka çakşır ve iki güğümü müvekkile-i mezbûre Gülbuy Hatun ketm ü ihfâ edip defter-i merkūma idhâlden imtinâ‘ eder suâl olunup tashîh-i mezbûr üzere eşyâ-i mezkûre semeninden sagīre-i mezbûre Fâtıma’ya isâbet eden hissesi alıverilmek bi’l-vesâye matlûbumdur dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda ityân-ı beyyineden ızhâr-ı acz ile istihlâf etmeğin müvekkile-i mezbûre Gülbuy Hatun’u tahlîf içün savb-ı şer‘den irsâl olunan Mevlânâ Hâfız Mehmed Efendi b. eş-Şeyh Mustafa mahalle-i mezbûrede müvekkile-i mezbûrenin menziline varıp zeyl-i kitâbda muharrerü’l-esâmî Müslimîn huzûrlarında zâtı mu‘arrifân-ı mezbûrân ta‘rîfleriyle mu‘arrefe olan mezbûre Gülbuy Hatun’a zikr olunan eşyâyı ketm ü ihfâ etmeyip üzerine redd ü damân lâzım gelmediğine mezbûre Âişe Hatun’un muvâcehesinde yemîn teklîf eyledikde ol dahi hasbe’l-mesûl yemîn billâhi’l-aliyyi’l-a‘lâ eylediğini mevlânâ-yı mezbûr mahallinde ketb ü tahrîr edip ba‘dehû ma‘an ba‘s olunan Hüseyin b. Mehmed ve Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mûcebiyle müdde‘iye-i mezbûre Âişe Hatun husûs-ı mezbûra müte‘allık müvekkile-i mezbûre Gülbuy Hatun ile bilâ-beyyine mu‘ârazadan men‘ olunup mâ-vaka‘a kayd-şüd. Fî 16 min-Recebi’l-ferd sene 1110 Şuhûdü’l-hâl: es-Seyyid İsmail Ağa b. es-Seyyid Mahmud el-Mübâşir, Mehmed Çelebi b. Ali, Abdülbaki Çelebi b. İbrahim el-Müezzin, Ahmed Efendi b. Ali, Mustafa Çelebi b. Mustafa, Süleyman Çelebi b. Ali