Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1020 Hüküm no: 834 Orijinal metin no: [190a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Mehmed Paşa’nın küçük kızlarının vasileri Ali Ağa’nın muhasebesi Vilâyet-i Anadolu’da Sığla sancağında Şahme kazâsına tâbi‘ Panayır nâm karye ahâlîsinden iken düyûnu terekesinden ezyed olduğu hâlde vefât eden merhûm Mehmed Paşa b. Mustafa Bey’in sulbiye kızları olup hâlâ mahmiye-i İstanbul’da Sekbanbaşı Yakub Ağa mahallesinde sâkine Âişe Hanım ve Fâtıma Hanım nâm sagīrelerin tesviye-i emrlerine vasiyy-i muhtârları olan Ali Ağa b. İbrahim’in üzerine hasbî nâzırı ve ammileri Süleyman Efendi’nin vekîli eş-Şeyh Osman Efendi ma‘rifetiyle makbûz ve masrûfunun görülen hesâbı defteridir ki ber-vech-i âtî zikr olunur. Fî evâhir-i Recebi’l-ferd sene 1110 Sagīretân-ı mezbûretânın vâlideleri olup fevt olan Rahime Hanım’dan müntakil ber-mûceb-i defter hisseleri 202 guruş 1 sümün Ba‘dehû fevt olan ceddeleri Emine Hatun’dan kezâlik ber-mûceb-i defter hisseleri 350 guruş 10 sümün Ba‘dehû fevt olan li-ebeveyn karındaşları Ali Bey’den ber-mûceb-i defter hisseleri 376 guruş 8 sümen Karındaşları mezbûr Ali Bey’in tasarrufunda olup tapu ile mezbûrelere intikāl eden zikri âtî Çine ve Şahme kazâlarında vâki‘ çiftlikler arâzisinden makbûz-ı vasî 200 guruş Yekûn: 1129 guruş 10 sümün Minha’l-ihrâcât: Yüz sekiz senesi Şevvâli gurresinden târîh-i deftere gelince sagīretân-ı mezbûretânın ve hâdim ve hâdimelerinin yevmî yirmişer paradan bâ-hüccet nafakaları 330 guruş Yüz sekiz ve yüz dokuz senelerinde sagīrelerin ve hâdin ve hâdinelerinin iydiyye libâsları 40 guruş İcâre-i menzil der-İstanbul 17,5 guruş Harc-ı muhâsebe 10 guruş Kâtibiye ve huddâmiye 2 guruş Zikr olunan sagīreleri bi’l-izni’ş-şer‘î İstanbul’a nakl içün harc-ı râh 80 guruş Sagīrelere İstanbul’da isti‘mâl içün alınıverilen yorgan ve döşek ve yastık ve minder ve sahan ve tencere ve sâir mühimmât-ı beyt 60 guruş Zikr olunan hisse-i irsiyelerini tahsîl içün Güzelhisar nâibine verilen harc-ı hücec 63 guruş Yekûn ihrâcât: 607,5 guruş El-bâkī: 522 guruş 10 sülüs Müteveffâ-yı (sagīretân-ı) mezbûretânın karındaşları müteveffâ-yı mezbûr Ali Bey’in ile’l-vefât tasarrufunda olup zikr olunan Şahme kazâsında vâki‘ Küçük Panayır <> ve Büyük Panayır ve Başıkaraca ve Çine kazâsında vâki‘ Sivripos(?) ve Arabhisarı ve Dalama kazâsında vâki‘ Karaayit (Karahayıt) ve Dereköyü ve Balcılar ve Tozalaklı ve Karaçalı ve Kasap? nâm karyelerde vâki‘ çiftliklerin arâzisi müstahıkk-ı tapu olup bi-hasebi’l-kānûn hakk-ı tapu sagīretân-ı mezbûretân ile [190b] kebîr kız karındaşları diğer Fâtıma Hanım’a intikāl edip zikr olunan arâzinin sülüsânı sagīretân-ı mezbûretân içün ashâbından tapu-yı misli ile tefevvüz olunmak haklarında nef‘-i mahz olduğunu Güzelhisar nâibi Ahmed Efendi huzûrunda bî-garaz Müslimîn ihbâr etmekle vasiyy-i mezbûr Ali Ağa’ya istidâne edip zikr olunan arâziyi tapu-yı misli ile sâhib-i arz olanlardan sagīreler içün tefevvüze izin ve yedine hüccet-i şer‘iyye vermekle vasiyy-i mezbûr dahi ba‘de’l-istidâne zikr olunan arâzi ashâbına iki bin beş yüz guruş verip arâzi-yi mezbûreyi tefevvüz edip ve altmış guruş dahi husûs-ı mezbûr içün ihrâc olunan otuz altı kıt‘a evâmir-i şerîfe harcına verip cem‘an masrûfu olan iki bin beş yüz altmış guruş zikr olunan arâzinin menâfi‘inden edâ olunmak üzere işbu mahalle şerh verildi. Sahh.