Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1021 Hüküm no: 835 Orijinal metin no: [190b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Elmas Mehmed Paşa’nın İbrahim Bey’de olan eşyalarını vasisinin teslim aldığı Husûs-ı âti’l-beyânın mahallinde ketb ü tahrîri iltimâs olunmağın cânib-i şerî‘at-i garrâdan me’zûnen irsâl olunan Mevlânâ Abdurrahman Efendi b. el-merhûm Ahmed Efendi mahmiye-i İstanbul’da Emin Sinan mahallesi ahâlîsinden İbrahim Bey b. Abdurrahman Ağa’nın menziline varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i nebevî ettikde asrında sadrazam olup bin yüz dokuz senesinde vâki‘ sefer-i hümâyûnda Senta nâm mevzi‘de Nemçe taburu muhârebesinde şehîden vedâ‘-ı âlem-i fânî eden Elmas Mehmed Paşa b. Abdurrahman Ağa’nın düyûnu terekesinden ezyed olmağla tesviye-i umûruna kıbel-i şer‘-i enverden vasî ve kayyım nasb olunan merhûm-ı müşârün-ileyhin etbâ‘ından Telhîsî Abdullah Ağa b. Mehmed meclis-i ma‘kūd-ı mezbûrda mûmâ-ileyh İbrahim Bey b. Abdurrahman Ağa mahzarında bi’l-vesâye ikrâr ve takrîr-i kelâm edip merhûm-ı müşârün-ileyhin eşyâ-i memlûkesinden işbu yedimde olan sûret-i defter-i Mevkūfât mûcebince mûmâ-ileyh İbrahim Bey’in yedinde emânet olan eşyâyı vesâyet-i mahkiyem hasebiyle bi’t-tamâm ve’l-kemâl ahz u kabz eyledim yedinde bir şey bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Çukadâr el-Hâc Süleyman ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 15 min-Cumâdelâhire sene 1110 Şuhûdü’l-hâl: Ahmed Efendi b. Mustafa İmâm-ı Sâlis-i Sultan Selim, Sunullah Efendi b. Osman el-Kādı, Mustafa Efendi b. Mehmed el-İmâm, İsmail Efendi b. Mustafa Paşa, Osman Bey b. Mustafa Paşa.