Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1022 Hüküm no: 836 Orijinal metin no: [190b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın babasından intikal eden eşya ve miras hissesini vasisi Kenan Ağa’dan teslim aldığı Husûs-ı âti’l-beyânın mahallinde ketb ü tahrîri içün bi’t-taleb savb-ı şer‘-i kavîmden me’zûnen irsâl olunan Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Hocapaşa mahallesinde sâkin umdetü’l-emâcid ve’l-a‘yân Kenan Ağa b. Abdullah’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Pirinççi Sinan mahallesinde sâkin iken bundan akdem vefât eden Başbâki kulu Yusuf Ağa b. Ebubekir’in kebîr oğlu ve sin ve cüssesinin bülûğunu mu‘terif olan Mustafa Ağa meclis-i ma‘kūd-ı mezbûrda hâl-i sıgārında vasiyy-i mansûbu olmağla hissesine vaz‘-ı yed eden işbu sâhibü’l-kitâb mûmâ-ileyh Kenan Ağa mahzarında ikrâr ve takrîr-i kelâm edip müşârün-ileyh Kenan Ağa hâl-i sıgārımda vasiyy-i mansûbum olmağla mülk-i mevhûbum olan işbu bir sîm haydarî raht ma‘a başlık ve bir sîm gaddâre ve bir Mesnevî-i şerîf ve kehribâr tesbîh ve bir Şam merresi(?) ve bir yemenî hâtem ve bir beç taşı hâtem ve bir sîb pazubendimi medîne-i Üsküdar’da babam merhûm-ı mezbûrdan müntakil vakıf menzilim icâresinden makbûzu olan yirmi iki yaldız altını ile bir guruşu ve Nebi Ağa zevcesinin yüz elli guruş mukābelesinde babam merhûm-ı mezbûr yedinde rehin olan on bâfteli bir mücevher kuşağı hâlâ ben bâliğ ve reşîd olmağla vasiyy-i mezbûr Kenan Ağa bana def‘ u teslîm ben dahi yedinden tamâmen alıp kabz eyledim min-ba‘d zikr olunan eşyâdan yedinde bir şeyi kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 22 Recebi’l-ferd sene 1110 Şuhûdü’l-hâl: Mefharü’l-müderrisîn Ebubekir efendi b. Hızır, Mustafa Çelebi b. Ömer, el-Hâc Abdi b. Ebubekir, Hasan Çelebi b. Abdullah, Mehmed b. Musa, Şehsuvar b. Abdullah.