Bab Mahkemesi 54 Numaralı Sicil (H. 1102 / M. 1691) cilt: 20, sayfa: 77 Hüküm no: 38 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atam v. Yakobi’nin Sava Reis v. Penaye’ye borcu olduğunu kabul etmesi Vilâyet-i Rumeli’nde kasaba-i Kili ahâlîsinden Sava Reis v. Penaye nâm zimmî tarafından husûs-ı âti’z-zikre sâbitü’l-vekâle vekîl olan Senbuyi Atam Reis v. Canbeti nâm zimmî meclis-i şer‘-i şerîf-i enverde, diğer Atam v. Yakomi nâm zimmî muvâcehesinde bi’l-vekâle üzerine da‘vâ ve takrîr-i kelâm edip, târih-i kitâbdan elli gün mukaddem kasaba-i Kili’de mezbûr Sava Reis işbu merkūme diğer Atam’a yüz guruş ile on sekiz bin mangırını idâne ve teslîm, ol dahi istidâne ve kabz ve istihlâk eyledikden sonra zikr olunan on sekiz bin mangır mukābelesinde müvekkilem mezbûre yüz elli guruş vermek üzre beynlerinde kavl ve ittifâk eyledikden sonra meblağeyn-i mezbûreyni merkūm diğer Atam’dan taleb ve da‘vâ ahz u kabza mezbûr Sava Reis tarafından beni vekîl edip, ben dahi ba‘de kabûli’l-vekâle meblağ-ı mezbûr yüz guruşu yedinden ahz u kabz edip, mâ‘adâsı zimmetinde kalmağın, hâlâ suâl olunup zikr olunan sekiz bin mangır için yüz elli guruşun alıverilmesi matlûbumdur dedikde, gıbbe’s-suâl mezbûr diğer Atam cevâbında, fi’l-hakīka müvekkil-i merkūm Sava Reis’den yüz guruş ile on sekiz bin mangır ahz u kabz ve istihlâk edip, meblağ-ı mezbûrdan vekîl-i mezbûrun kabzına mu‘terif olduğu yüz guruşdan mâ‘adâ on sekiz bin mangır zimmetinde el-ân deyni idiğini ikrâr ve i‘tirâf etmeğin, mûcebince mezbûrânın kavilleri kavl-i mu‘teber olmağla, zikr olunan on sekiz bin mangırın mislini edâya ba‘de’t-tenbîh, mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Çavuş el-mübâşir, İbrahim Çelebi b. Ahmed, İbrahim Çelebi b. Mehmed, Galatalı Mustafa, Ali [b.] Bâli.