Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1022 Hüküm no: 837 Orijinal metin no: [190b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın aldığı emlâk ve tarla gelirlerini vekili olduğu müteveffa Arslan Mustafa Bey’e ölmeden önce teslim ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden bi’t-taleb me’zûnen irsâl olunan Mevlânâ Emin Mehmed Efendi b. el-merhûm Ârif Mehmed Efendi mahmiye-i İstanbul’da Çıkrıkçı Kemâl mahallesinde fahrü’l-akrân Hamamcızâde Ahmed Ağa b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde mahmiye-i mezbûrede Suhte Sinan mahallesi ahâlîsinden olup bundan akdem vefât eden Arslan Mustafa Bey b. el-merhûm Kara Hasan Ağazâde Mustafa Paşa’nın verâseti vâlidesi Fethi Hatun bt. Abdullah ile li-ümmin kız karındaşları Hadîce ve Fâtıma bintey Mühürdâr el-Hâc Mehmed Ağa ve Emetullah bt. Ali Ağa’ya ve li-ebin kız karındaşları Emine Hanım ve Safiye Hanım ve Fâtıma Hanım ve Hadîce Hanım ve Hanife Hanım’a ve li-ebin karındaşları Halil Bey ve Abdullah Bey ve Ahmed Bey’e münhasıra oldukdan sonra sagīretân-ı mezbûretân Hadîce ve Fâtıma’nın babaları ve velîleri mezbûr Mühürdâr el-Hâc Mehmed Ağa velâyeten ve mezbûre Safiye Hanım tarafından husûs-ı âti’l-beyânda müseccel vekîli Abacı el-Hâc Mustafa b. İbrahim ile mezbûre Hanife Hanım tarafından husûs-ı âti’l-beyânda vekîl-i müsecceli zevci Ahmed Efendi b. el-Hâc Mehmed vekâleten meclis-i ma‘kūd-ı mezbûrda hâfızü’l-kitâb Ali Ağa b. Halil mahzarında her biri üzerine da‘vâ ve takrîr-i kelâm edip mezbûr Ali Ağa müteveffâ-yı mezbûr Arslan Mustafa Bey’in hayâtında vekîli olmağla babası merhûm-ı mezbûr Mustafa Paşa’dan müntakil emlâk menâfi‘inden ber-mûceb-i defter-i muhâsebe hissesi on dört bin dokuz yüz yirmi beş akçe kezâlik ber-mûceb-i defter-i mezbûr yüz sekiz senesinde [191a] karlar menâfi‘inden hissesi olan on dokuz bin sekiz yüz yetmiş dokuz akçesini kabz edip kable’l-edâ mezbûr Arslan Mustafa Bey fevt olmağla meblağayn-ı mezbûreynden sagīretân-ı mezbûretân ile müvekkiletânın hisse-i şer‘iyyelerini taleb ederiz suâl olunsun dedikde gıbbe’s-suâl mezbûr Ali Ağa cevâbında ber-mûceb-i defter-i mezbûr emlâk menâfi‘inden müteveffâ-yı mezbûrun hissesi olup bi’l-vekâle makbûzum olan on dört bin dokuz yüz yirmi beş akçenin on dört bin iki yüz bir akçesini beher şehr beşer guruşdan on üç ayda kendüye teslîm edip hattâ meblağ-ı mezbûru ber-vech-i muharrer yedinden ahz u kabz eylediğini hayâtında ikrâr edip meblağ-ı mezbûrdan ancak zimmetimde yedi yüz yirmi dört akçe bâkī kalıp ve tarlalar menâfi‘inden kezâlik bi’l-vekâle makbûzum olan on dokuz bin sekiz yüz yetmiş dokuz akçeden on altı bin yüz otuz akçesini müteveffâ-yı mezbûra teslîm edip hattâ hatt ü hatmini hâvî yedime temessük dahi vermeğin meblağ-ı mezbûrdan dahi zimmetimde ancak üç bin yedi yüz kırk dokuz akçe bâkī kalmışdır deyü def‘le mukābele ve istintâk olunsun dedikde gıbbe’l-istintâk ve’l-inkâr müdde‘î-i mezbûrdan def‘-i meşrûhuna beyyine taleb olundukda udûl-ı ahrâr-ı ricâl-i Müslimînden müteveffâ-yı mezbûrun li-ebin karındaşı Halil Bey ve mûmâ-ileyh Hamamcızâde Ahmed Ağa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Arslan Mustafa Bey b. el-merhûm Kara Hasan Ağazâde Mustafa Paşa hayâtında emlâk menâfi‘inden mezbûr Ali Ağa’nın makbûzu olan on dört bin dokuz yüz yirmi beş akçeden on dört bin iki yüz bir akçesini yedinden alıp kabz eyledim ve tarlalar menâfi‘inden makbûzu olan on dokuz bin sekiz yüz yetmiş dokuz akçeden on altı bin yüz otuz akçesini yedinden alıp kabz eyledim deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve Osman b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 22 min-Şevvâli’l-mükerrem li-seneti tis‘a ve mi’ete ve elf. Şuhûdü’l-hâl: İshak Efendi b. Ali, Abdurrahman Çelebi b. Mustafa, Kasab Ali Beşe b. Hisârî, Mehmed Efendi b. Mustafa, Kasab Mehmed Beşe b. Hisârî, Şahin Beşe bin Abdullah.