Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1025 Hüküm no: 839 Orijinal metin no: [191b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye’nin bulûğunu ve rüşdünü ispat edip vasisinden mirasını teslim aldığı Mahmiye-i İstanbul’da Kazasker Mehmed Efendi mahallesi ahâlîsinden olup bundan esbak vefât eden Mustafa Ağa b. Abdurrahman’ın sulbiye kızı Safiye nâm bikr-i bâliğa tarafından husûs-ı âti’l-beyânda vekîl olduğu mahalle-i mezbûre sükkânından zât-ı mezbûreyi ma‘rifet-i şer‘iyye ile ârifân Abdullah Efendi b. Mehmed ve Mehmed Çelebi b. Ahmed şehâdetleriyle mahzar-ı hasm-ı câhidde sâbit ve sübût-ı vekâletine hükmolunan bâ‘isü’l-kitâb Mehmed Ağa b. Musa meclis-i şer‘-i hatîr-ı lâzımü’t-tevkīrde mezbûre Safiye’nin hâl-i sıgārında tesviye-i umûruna vasiyy-i muhtârı olan İbrahim Ağa b. Mehmed mahzarında üzerine da‘vâ ve takrîr-i kelâm edip müvekkilem mezbûre Safiye meblağ-ı nisâya bâliğa ve bülûğuna rüşdü munzam olup umûrunu görmeğe bi-nefsihâ kādire ve i‘ânet-i vasîden müstağniye olmağla babası müteveffâ-yı mezbûrdan intikāl edip vasiyy-i mezbûr yedinde olan mal-ı müntakilini bi’l-vekâle taleb ederim suâl olunsun dedikde gıbbe’s-suâl vasiyy-i mezbûr cevâbında mal-ı müntakiline vech-i muharrer üzere vaz‘-ı yedini ikrâr ve müvekkile-i mezbûre Safiye’nin bülûğ ve rüşdünü inkâr edicek vekîl-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden şâhidân-ı mezbûrân Abdullah Efendi b. Mehmed ve Mehmed Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müvekkile-i mezbûre Safiye bt. el-merhûm Mustafa Ağa b. Abdurrahman sin ve cüssesinin bülûğa tahammülü olmağla meblağ-ı nisâya bâliğa olduğunu huzûrumuzda ikrâr u i‘tirâf edip bülûğuna rüşdü dahi munzam olmağın umûrunu görmeğe bi-nefsihâ kādire [ve] i‘ânet-i vasîden müstağniyedir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vekîl-i mezbûr Mehmed Ağa meclis-i şer‘de vasiyy-i mezbûr İbrahim Ağa muvâcehesinde ikrâr ve takrîr-i kelâm edip müvekkile-i mezbûre Safiye’ye babası müteveffâ-yı mezbûrdan intikāl eden ber-mûceb-i defter-i muhâsebe her para üçer akçe hesâbı üzere on dört bin beş yüz elli üç akçeyi müvekkileme teslîm içün mezbûr İbrahim Ağa yedinden tamâmen alıp kabz eyledim meblağ-ı mezbûrdan yedinde bir akçe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 20 min-Recebi’l-ferd sene 1110 Şuhûdü’l-hâl: Uşşâkī Mehmed Efendi b. ( ), Süleyman Efendi b. Mehmed, Ahmed Çelebi b. Süleyman, Abdullah Efendi Mukayyid, İbrahim Çelebi b. Mehmed.