Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1026 Hüküm no: 840 Orijinal metin no: [191b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Şehbaz’ın hür olduğunu ispat ettiği Husûs-ı âti’l-beyânı mahallinde istimâ‘ ve tahrîri içün savb-ı şer‘-i enverden bi’t-taleb me’zûnen irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Kâtibkasım mahallesinde sâkine iken bundan akdem vefât eden Âişe Hatun bt. İbrahim’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûreye rıkk-ı sâbıkını mu‘terife işbu açık kaşlı orta boylu Rusiyyetü’l-asl Müslimetü’l-millet hâfızatü’l-vesîka Şehbaz bt. Abdullah meclis-i ma‘kūd-ı mezbûrda müteveffât-ı mezbûrenin zevc-i metrûku olmağla terekesine vâzı‘u’l-yed olan Ahmed Bey b. Mehmed mahzarında üzerine da‘vâ ve takrîr-i kelâm edip seyyidem müteveffât-ı mezbûre hâl-i kemâl-i sıhhatinde fevtinden bir sene mukaddem hasbeten lillâhi te‘âlâ huzûr-ı Müslimînde beni malından tahrîr ve i‘tâk edip ben hürre olmuş iken mezbûr Ahmed Bey rık olup terekeden olmak üzere bana bi-gayr-ı hakkın vaz‘-ı yed eder suâl olunup sebîlim tahliye olunmak matlûbumdur dedikde gıbbe’s-suâl mezbûr Ahmed Bey cevâbında mevsûfe-i mezbûreye terekeden olmak üzere vaz‘-ı yedini ikrâr ve vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kasab İlyas mahallesinde sâkin Süleyman Çelebi b. Sefer ve Karabaş mahallesinde sâkin Mehmed Çelebi b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Âişe Hatun bt. İbrahim hâl-i kemâl-i sıhhatinde fevtinden mukaddem müdde‘iye-i mezbûre Şahbaz’ı mülkünde olduğu hâlde hasbeten lillâhi te‘âlâ huzûrumuzda malından tahrîr ve i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Nezir ve İbrahim Çelebi b. Hasan ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 10 min-Recebi’l-ferd sene 1110 Şuhûdü’l-hâl: Abdullah Efendi b. Hasan, Mehmed Çelebi b. Ali, İbrahim Efendi b. Mehmed, Mehmed Ağa b. Hüseyin, el-Hâc Hasan Ağa b. Ömer, el-Hâc Musa b. Ömer, Ebubekir Bey b. Mehmed.