Bab Mahkemesi 54 Numaralı Sicil (H. 1102 / M. 1691) cilt: 20, sayfa: 78 Hüküm no: 39 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Nasuh’un cariyesi Canfedâ’yı azat edip bazı eşyalarını bağışlaması Mahmiye-i İstanbul’da Yenibahçe kurbunda Karabaş mahallesinde sâkine Fâtıma bt. Nasuh b. Ali nâm hâtun tarafından husûs-ı âti’l-beyânı ikrâr ve ikrâra vekîl olup, zât-ı mezbûreyi ma‘rifet-i şer‘iyye ile ârifân olan Müezzin Abdullah Çelebi b. Ramazan ve İbrahim Çelebi b. Ahmed şehâdetleriyle şer‘an vekâleti sâbite olan Mustafa Beşe b. Arslan meclis-i şer‘-i şerîfde, müvekkile-i mezbûreye zimmetini mu‘terife olan orta boylu, açık kaşlı, elâ gözlü Rûsiyyetü’l-asl bâ‘isetü hâze’l-vesîka Canfedâ [bt.] Abdullah mahzarında bi’l-vekâle takrîr-i kelâm ve ta‘bîr ani’l-merâm edip, müvekkilem mezbûre Fâtıma câriye-i memlûkesi olup mukaddemâ müdebbere eylediği işbu mezbûre Canfedâ’yı hasbeten lillâhi te‘âlâ ve hasbeten li rûh-ı rasûlihi’l-mu‘allâ tahrîr ve i‘tâk ve dıyk-ı rıkkıyyetden ıtlâk ve kazâ-i hürriyete ilhâk eyledi. Mezbûre Canfedâ sâir ahrâr-ı asliyyât gibi hürre olup, mevle’l-velâ üzerinde hakkı kalmayıp ve silk-i mülkünden münselik olan eşyâsından iki minder gılâfı ve köhne beledî döşek ve iki yemeni yorgan ve iki kumaş yorgan ve bir alaca Yanbolu kebesi ve bir mavi kebe ve bir iki ayaklı sandık ve dört sahan ve iki tencere ma‘a kapağı ile ve bir hoşâb tası ve bir hamam tası ve bir baklava tepsisi ve bir şam‘dan ma‘a mikrâs ve bir kahve ibriği ve bir al tava ve bir leğen ma‘a ibrik ve mezbûr yasdığı bu mecmû‘-ı mezbûre Canfedâ’ya hibe-i sahîha-i şer‘iyye ile hibe ve temlîk, ol dahi meclis-i hibede ittihâb ve kabûl eyledi. Ba‘de’l-yevm işbu mezbûre mülk-i mevhûbedir, keyfe mâ yeşâ mutasarrıf olsun dedikde, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Hasan Efendi b. Mustafa, Abdullah Efendi b. Mustafa el-müezzin, Gürcü Halil, Usta Mehmed b. Abdullah, Mustafa Efendi, Keçeci Eyyûb, Yusuf [b.] Abdullah ve gayruhüm.