Bab Mahkemesi 54 Numaralı Sicil (H. 1102 / M. 1691) cilt: 20, sayfa: 79 Hüküm no: 40 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Bâli’nin mehir ve nafaka bedellerini tahsil etmesi Mahmiye-i İstanbul’da Yedikule kurbunda Bucakbağı mahallesi sâkinelerinden Rahime bt. Bâli nâm sagīrenin dayısı ve tesviye-i umûruna kıbel-i şer‘den mansûb vasîsi olan Mustafa b. Resul meclis-i şer‘-i şerîf-i enverde, sagīr-i mezbûrenin zevc-i mutallıkı işbu râfi‘ü’l-kitâb Dede Mehmed b. Abdullah mahzarında ikrâr ve takrîr-i kelâm edip, mezbûr Dede Mehmed vasîsi olduğum sagīre-i mezbûre Rahime’nin zevc-i mezbûr Dede Mehmed zimmetinde mütekarrir ve ma‘kūdun aleyh olan beş yüz akçe mehr-i müecceli ile nafaka-i iddet ve me’ûnet-i süknâsı mukābelesinde bi’t-terâzî ta‘yîn olunan beş yüz akçe ki, cem‘an bin akçeyi mezbûr Dede Mehmed yedinden bi’l-vesâye işbu meclis-i şer‘de tamâmen ahz u kabz ve teslîm eyledim. Fîmâ ba‘d meblağ-ı mezbûrdan bir akçe ve bir habbe bâkī kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mi‘mâr Mehmed Halîfe, Mumcu Hasan Beşe, Hüseyin Beşe b. Mehmed, Galatalı Mustafa b. ( ), İbrahim Çelebi b. Ahmed.