Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 48 Hüküm no: 4 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un vasiyet ettiği paraların ilgili şahıslara verildiği Husûs-ı âti’z-zikrin mahâllinde ketb ü tahrîri için bi’l-iltimâs savb-ı şer‘-i enverden Mevlânâ Ahmed Efendi b. Osman irsâl olunup ol dahi mahmiye-i İstanbul’da Mimar Abbas mahâllesinde sâkine iken bundan akdem vefât eden Emetullah Hatun bt. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde, müteveffât-ı mezbûrenin mûsâ-lehlerinden es-Seyyid Mustafa b. es-Seyyid Hüseyin ve zâtları ta‘rîf-i şer‘î ile mu‘arrefe olan Ümmühani bt. Abdullah ve Emine bt. Abdullah ve Maksud bt. Abdullah ve Gülistan bt. Abdullah meclis-i ma‘kūd-ı mezkûrda müteveffât-ı mezbûrenin sülüs-i mâlından vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan bâ‘isü’l-kitâb es-Seyyid Ali Çelebi b. es-Seyyid Hasan mahzarında her biri ikrâr ve takrîr-i kelâm edip vasiyy-i mezbûr es-Seyyid Ali Çelebi’nin yedinde olan hüccet-i şer‘iyyede tasrîh olunduğu üzere müteveffât-ı mezbûre Emetullah Hatun sülüs-i mâlından bizim için vasiyet eylediği cem‘an iki yüz otuz beş guruşu vasiyy-i mezbûr bize tamâmen def‘ u teslîm biz dahi ber-mûceb-i hüccet-i mezkûre bi-kadri’l-hısas yedinden her birimiz alıp kabz eyledik, min-ba‘d meblağ-ı mûsâ-bih-i mecmû‘-ı mezkûr iki yüz otuz beş guruşdan vasiyy-i mezbûr es-Seyyid Ali Çelebi yedinde bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. İsmail ve el-Hâc Veli b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 22 min-Cumadelûlâ sene 1143. Şuhûdü’l-hâl: Osman Efendi b. Halil imam-ı mahâlle, Mustafa Çelebi b. Mehmed berber, el-Hâc Mustafa b. Hasan, es-Seyyid Mehmed Çelebi b. Mustafa, Hasan Çelebi b. Abdullah, Ahmed Çelebi b. Abdullah, es-Seyyid Mustafa b. Abdullah, Yusuf Efendi b. Mehmed.