Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 49 Hüküm no: 5 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteciler Kethüdası Mehmed Ağa’nın terekesinden olan kerestenin Tophaneli Mehmed Ağa’ya satıldığı Husûs-ı âti’l-beyanın mahâllinde ketb ü tahrîri için savb-ı şer‘i’l-enverden bi’t-taleb Mevlânâ Sa‘di Ali Efendi irsâl olunup ol dahi mahmiye-i İstanbul’da Ayazma kapısı hâricinde vâki‘ hâlâ Kereste Kethüdâsı Mustafa b. el-Hâc Mehmed’in odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i İstanbul’da Vâlide hanı kurbünde Dâye Hatun mahâllesinde sâkin iken bundan akdem vefât eden sâbıkā Keresteciler Kethüdâsı el-Hâc Ahmed Ağa b. el-Hâc Hüseyin’in verâseti zevce-i menkûha-i metrûkesi Meryem Hatun bt. el-Hâc Mustafa’ya ve li-ebeveyn kız karındaşı Hâce Rukıye Hatun’a münhasıra oldukdan sonra müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olan fahrü’l-a‘yân İsmail Efendi b. el-Hâc İbrahim ile mezbûre Meryem Hatun taraflarından husûs-ı âti’l-beyanda müseccel vekîlleri olan el-Hâc Süleyman Ağa b. Abdullah vekâleten ve mezbûre Hâce Rukıye Hatun tarafından dahi kezâlik müseccel vekîli Ali Efendi b. Ali dahi vekâleten ve merkūme Emetullah Hatun tarafından dahi kezâlik müseccel vekîli olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa dahi vekâleten meclis-i ma‘kūd-ı mezbûrda keresteci tâifesinden işbu bâ‘isü’l-kitâb Tophaneli es-Seyyid el-Hâc Mehmed Ağa b. Mehmed mahzarında her biri bi’l-vekâle ikrâr ve takrîr-i kelâm edip müteveffâ-yı mezbûr sâbık Keresteciler Kethüdâsı el-Hâc Ahmed Ağa b. el-Hâc Hüseyin’in mahmiye-i mezbûrede Odun kapısı hâricinde vâki‘ keresteci dükkânında olan ecnâsı beynimizde ma‘lûm ber-mûceb-i defter-i müfredât kerestesi ba‘de’l-müzâyede ve inkıtâ‘i’r-rağbet semen-i misli olan yedi yük seksen bin akçeye mezbûr Tophaneli es-Seyyid el-Hâc Mehmed Ağa’ya safka-i vâhide ile vekâletimiz hasebiyle bey‘ ü temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl edip semen olan meblağ-ı mezbûr yedi yük seksen bin akçeyi mezbûr Tophaneli es-Seyyid el-Hâc Mehmed Ağa yedinden bi’l-vekâle bi’t-tamâm ve’l-kemâl alıp kabz eyledi, min-ba‘d meblağ-ı mezbûr yedi yük seksen bin akçeden merkūm es-Seyyid el-Hâc Mehmed Ağa yedinde ve zimmetinde bir akçe ve bir habbe bâkī kalmayıp dükkân-ı merkūm içinde olan keresteye müte‘allıka âmme-i da‘vâdan her birimiz âharın zimmetlerini ibrâ-i âm ile ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Ali Çelebi b. İbrahim ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Cumâdelûlâ li-sene selâse ve erba‘în ve mi’e ve elf. Şuhûdü’l-hâl: el-Hâc Mustafa Ağa b. Murtaza, el-Hâc Ahmed Ağa b. Mustafa, Hasan Çelebi b. Abdullah, Mehmed Çelebi b. Süleyman, Kethüdâ Mustafa Ağa