Bab Mahkemesi 54 Numaralı Sicil (H. 1102 / M. 1691) cilt: 20, sayfa: 79 Hüküm no: 41 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in boşandığı eşinde kalan eşyalarını alması Mahmiye-i İstanbul’da Keçeci mahallesi sâkinelerinden Ayşe bt. Mehmed nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i muhâlı‘ı bâ‘isü hâze’l-kitâb Derviş Mehmed b. Hüseyin mahzarında ikrâr ve takrîr-i kelâm edip, zevc-i muhâlı‘ı mezbûr Derviş Mehmed ile târih-i kitâbdan bir sene mukaddem muhâla‘a olduğumuzda benim eşyâ-i memlûkemden bir sandal kürk kabı ve bir seccâde ve bir kahve ibriğim bi gayri vech yedinde kaldı deyu bundan akdem mezbûr Derviş Mehmed[‘den] taleb ve da‘vâ etmişdim. El-hâletü hâzihî merkūm Derviş Mehmed mezkûr kürk yüzü mukābelesinde bi’t-terâzî iki guruş ve zikr olunan seccâde ve yorgan ve kahve ibriğini bi a‘yânihâ bana def‘ ve teslîm, ben dahi ber vech-i muharrer meblağ-ı mezbûr ile eşyâ-i mezkûreyi yedinden ahz u kabz eylediğimden sonra husûs-ı mezkûra ve bi’l-cümle târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan mezbûr Derviş Mehmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ali Çelebi b. Bâli, Ahmed Çelebi b. Ahmed, Mustafa Çelebi b. Şaban, Nasuh b. Osman.