Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 50 Hüküm no: 6 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Çelebi’nin oğlu Mehmed’e nafaka takdiri Mahmiye-i İstanbul’da İsmail Ağa mahâllesi ahâlîsinden olup Keban kasabasında nâib iken bundan akdem vefât eden Ali Efendi b. Mustafa Çelebi’nin sulbî sagīr oğlu Mehmed’in min-kıbeli’l-eb ceddi ve tesviye-i umûruna bâ-hüccet-i şer‘iyye mansûb vasîsi işbu bâ‘isü’l-kitâb mezbûr Mustafa Çelebi b. İsa talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr Mehmed’e babası müteveffâ-yı mezbûrdan müntakil mâlından târîh-i kitâbdan beher yevm ikişer para nafaka ve kisve-baha farz ve takdîr buyurup meblağ-ı mefrûz-ı mezbûr yevmî iki parayı sagīr-i mezbûr Mehmed’in nafaka ve kisve-baha ve sâir levâzım-ı zarûriyesine harc u sarfa ve vakt-i hâcetde istidâneye ve lede’z-zafer mâlına rücû‘a vasiyy-i mezbûr Mustafa Çelebi’ye izin birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelûlâ li-sene selâse ve erba‘în ve mi’e ve elf. Şuhûdü’l-hâl: el-Hâc Mustafa Ağa b. Hasan, el-Hâc Halil b. Abdullah, Hasan Çelebi b. Mehmed, Berber Mehmed Çelebi b. Mustafa, Feyzullah Beşe, Seyfi Çelebi b. Ahmed