Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 50 Hüküm no: 7 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızı Ayşe’ye olan borcunu ödemeden vefat eden Hüseyin Efendi’nin terekesinden bu paranın tahsili Husûs-ı âti’z-zikrin mahâllinde istimâ‘ ve tahrîri için savb-ı şer‘-i enverden mezûnen Mevlânâ Abdullah Efendi b. el-merhûm İbrahim Efendi irsâl olunup ol dahi mahmiye-i İstanbul’da Mimar Abbas mahâllesinde sâkin iken bundan akdem vefât eden Dergâh-ı âlî yeniçerileri yazıcılarından Hüseyin Efendi b. Bayram’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun ümmü’l-veledi ve sulbiye sagīre kızı Âişe’nin tesviye-i umûruna kıbel-i şer‘den mansûbe vasiyyesi olup zâtı ta‘rîf-i şer‘î ile mu‘arrefe olan işbu bâ‘isü’l-kitâb Şahbaz Hatun bt. Abdullah meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı kezâlik ta‘rîf-i şer‘î ile mu‘arrefe olan Hadîce Hatun bt. Hasan mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Efendi b. Bayram b. Abdullah zimmetinde kızı sagīre-i mezbûre Âişe’ye vâlidesi müteveffât Hanife Hatun bt. Abdullah’dan müntakil otuz bin akçe bi’l-velâye ahz u kabz ve kendi masârıfına sarf ile istihlâk edip hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden sagīre-i mezbûreye zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt [2b] olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûre müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından müteveffâ-yı mezbûrun li-ebeveyn karındaşı Mehmed Ağa b. el-mezbûr Bayram ve Mustafa Ağa b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hüseyin Efendi b. Bayram b. Abdullah hâl-i kemâl-i sıhhatinde kızı sagīre-i mezbûre Âişe’ye vâlidesi müteveffât Hanife Hatun bt. Abdullah’dan müntakil otuz bin akçeyi bi’l-velâye ahz u kabz ve kendi masârıfına sarf ile istihlâk edip ve meblağ-ı mezbûr cihet-i merkūmeden sagīre-i mezbûre Âişe zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın vasiyy-i mezbûrun husûs-ı mezkûrda sun‘u olmadığına yemîn dahi teveccüh etmeyip mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. Hasan ve Mehmed Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Min-şehri Rebî‘i’l-âhir li-sene selâse ve erba‘în ve mi’e ve elf. Şuhûdü’l-hâl: Mustafa Çelebi b. Salih, Hüseyin Çelebi b. Mehmed, Mehmed Çelebi b. Ahmed, Mustafa Çelebi b. Hasan, Mehmed Çelebi b. Abdullah