Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 51 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yazıcı Hüseyin Efendi’nin terekesinden hanımı Ayşe’nin mehrinin ödenmesi Husûs-ı âti’l-beyanın mahâllinde istimâ‘ı ve tahrîri için savb-ı şer‘-i enverden mezûnen Mevlânâ Abdullah Efendi b. el-merhûm İbrahim Efendi irsâl olunup ol dahi mahmiye-i İstanbul’da Mimar Abbas mahâllesinde sâkin iken bundan akdem vefât eden Yazıcı Hüseyin Efendi b. Ahmed’in mahâlle-i mezbûrede vâki‘ menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde, müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isü’l-kitâb Hadîce Hatun bt. Hasan meclis-i ma‘kūd-ı mezbûrda müteveffâ-yı mezbûrun ümmü’l-veledi ve sulbî sagīr oğlu Ahmed ve sulbiye sagīre kızı Âişe’nin tesviye-i emrlerine kıbel-i şer‘den mansûbe vasiyyeleri olmağla terekesine bi’l-vesâye vâzı‘atü’l-yed olup zâtı kezâlik ta‘rîf-i şer‘î ile mu‘arrefe olan Şahbaz Hatun bt. Abdullah mahzarında üzerine da‘vâ ve takrîr-i kelâm edip zevcim müteveffâ-yı mezbûr Yazıcı Hüseyin Efendi b. Abdullah zimmetinde mütekarrer ve ma‘kūdün-aleyh iki bin akçe mehr-i müeccel hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden olup mahâlle-i mezbûre sükkânından el-Hâc Hasan b. el-Hâc İsmail ve es-Seyyid Ahmed b. es-Seyyid Mustafa li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Yazıcı Hüseyin Efendi b. Ahmed b. Abdullah hâl-i kemâl-i sıhhatinde zevcesi işbu müdde‘iye-i mezbûre Hadîce Hatun zimmetinde mütekarrer ve ma‘kūdün-aleyh iki bin akçe mehr-i müeccel vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr [ve] ma‘an irsâl olunan Mustafa Çelebi b. Hasan ve Mehmed Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebî‘i’l-âhir li-sene selâse ve erba‘în ve mi’e ve elf. Şuhûdü’l-hâl: Mehmed Efendi b. Bayram, Mumcu Mustafa Ağa b. Abdullah, Mustafa Çelebi b. Salih, Hasan Çelebi b. Mehmed, Mehmed Çelebi b. Ahmed, Ali Çelebi b. Mehmed, Ali Çelebi b. Mustafa