Bab Mahkemesi 54 Numaralı Sicil (H. 1102 / M. 1691) cilt: 20, sayfa: 80 Hüküm no: 42 Orijinal metin no: [7a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Bekir b. Mahmud’un kölesi Abdullah’ı mükâtebe yoluyla azat etmesi Mahmiye-i İstanbul’da Mimar Ayas mahallesinde sâkin el-Hâc Bekir b. Mahmud b. Derviş’in oğlu tarafından husûs-ı âti’l-beyâna vekîl olduğu Mustafa Reis b. Abdullah ve İbrahim Çelebi b. Mehmed şehâdetleriyle şer‘an sâbit olan Mehmed Çelebi nâm kimesne meclis-i şer‘-i şerîf-i enverde, müvekkil-i mezbûra rıkkını mu‘terif olan işbu uzun boylu, açık kaşlı, elâ gözlü kumral bıyıklı Rûsiyyü’l-asl Abdullah b. Abdullah mahzarında bi’l-vekâle ikrâr ve takrîr-i kelâm edip, babam müvekkil-i mezbûr el-Hâc Bekir abd-i memlûkü olan işbu mevsûf-ı mezbûr Abdullah’ı târih-i kitâbdan on beş sene tamâmına değin hizmet etmek üzre kitâbete kat‘ edip, ol dahi akd-i mezbûru kabûl etmekle, ba‘de’l-yevm mevsûf-ı mezbûr Abdullah kitâbe ale’l-hızme tarîkle mükâteb olup, müddet-i madrûbe tamâmında sâir ahrâr gibi hür olsun dedikde, gıbbe’t-tasdîki’l-vicâhî mâ vaka‘a bi’t-taleb ve’l-ibtigā ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Abdülmuttalib Efendi el-imâm, Kadri Beşe b. Receb, el-Hâc Hasan b. Mahmud, el-Hâc Ali b. Hasan, Mehmed Çelebi b. Ali, es-Seyyid Hasan Çelebi b. Mustafa, Yusuf Beşe b. Abdullah.