Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 60 Hüküm no: 17 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hatice Hatun’un kızları Fatıma ve Ayşe’ye nafaka takdiri Mahmiye-i İstanbul’da Oruç Gāzî mahâllesinde sâkine iken bundan akdem vefât eden Hadîce Hatun bt. Abdullah’ın sulbiye sagīre kızları Fâtıma ve Âişe’nin babaları ve tesviye-i emrlerine bâ-hüccet vasiyy-i muhtârları işbu bâ‘isü’l-kitâb Ali Ağa b. Mehmed talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīretân-ı mezbûretân Fâtıma ve Âişe’nin müntakil mâllarından târîh-i kitâbdan her birine beher yevm onar akçe nafaka ve kisve-baha farz ve takdîr buyurup meblağ-ı mefrûz-ı mezbûr her birine beher yevm onar akçeyi nafaka ve kisve-baha ve sâir levâzım-ı zarûriyesine harc u sarfa ve vakt-i hâcetde istidâneye ve lede’z-zafer mâllarına rücû‘a vasiyy-i mezbûr Ali Ağa’ya izin birle mâ-vaka‘a bi’t-taleb ketb olundu. Fî 24 min-Cumâdelûlâ sene 1143. Şuhûdü’l-hâl: Mehmed Efendi b. Abdülkadir Efendi, el-Hâc Osman b. Mehmed, el-Hâc Mustafa b. Hüseyin, Edhem Çelebi b. Halil, Ahmed Çelebi b. Mehmed, Mehmed Çelebi b. Abdullah