Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 69 Hüküm no: 30 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun hayattayken kocasına mehrini hibe ettiğinden varislerin bu parayı talep edememeleri Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen irsâl olunan Mevlânâ Mehmed Efendi b. İbrahim mahmiye-i İstanbul’da Firuz Ağa mahâllesinde sâkine iken bundan akdem vefât eden Âişe Hatun ibneti’l-merhûm Ahmed Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûkü [Ahmed] Ağa b. el-Hâc Mustafa ile vâlidesi Reyhan Hatun bt. Abdullah ve sadriye kebîre kızı Ümmü Gülsüm ve sadrî sagīr oğulları Mustafa ve İbrahim’e münhasıra ve tashîh-i meselesi altmış sehmden olmağla sihâm-ı mezbûrenin on beş sehmi zevci mezbûr el-Hâc Ahmed Ağa’ya ve on sehmi vâlidesi mezbûre Reyhan Hatun’a ve bâkī otuz beş sehmin on dörder sehmi sagīrân-ı mezbûrândan her birine ve yedi sehmi mezbûre Ümmü Gülsüm’e isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Reyhan Hatun asâleten ve sagīrân-ı mezbûrâna tashîh-i li’d-da‘vâ vasî ve kayyım nasb olunmağla vesâyeten meclis-i ma‘kūd-ı mezkûrda tereke-i müteveffât-ı mezbûra bi’l-verâse vâzı‘ü’l-yed olan bâ‘isü’l-kitâb mezbûr el-Hâc Ahmed Ağa mahzarında bi’l-asâle ve bi’l-vesâye üzerine da‘vâ ve takrîr-i kelâm edip müteveffât-ı mezbûre Âişe binti’l-merhûm Ahmed Efendi’nin zevci mezbûr el-Hâc Ahmed Ağa zimmetinde mütekarrer ve ma‘kūdün-aleyh yirmi dört bin akçe mehr-i müeccel hakkı olup kable’l-ahz fevt olmağla meblağ-ı mezbûrdan tashîh-i mezbûr üzere bana ve sagīrân-ı mezbûrâna isâbet eden on beş bin iki yüz akçeyi mezbûr el-Hâc Ahmed Ağa’dan taleb ederim, suâl olunsun dedikde gıbbe’s-suâl mezbûr el-Hâc Ahmed Ağa cevâbında zevcesi müteveffât-ı mezbûreye zimmetinde yirmi dört bin akçe mehr-i müeccel deyni olduğunu ikrâr lâkin zevcem müteveffât-ı mezbûre Âişe Hatun ibneti’l-merhûm Ahmed Efendi b. Abdullah hâl-i kemâl-i sıhhatinde fevtinden altı sene mukaddem mehr-i müeccel-i mezkûr yirmi dört bin akçeyi huzûr-ı Müslimînde bana hibe-i sahîha-i şer‘iyye ile hibe ve temlîk ben dahi meclis-i hibede ber-vech-i muharrer ittihâb ve kabûl ve temellük edip zimmetim berî olmuşdur deyü def‘le mukābele ve istintâk edâ olunsun dedikde gıbbe’l-istintâk ve’l-inkâr mezbûr el-Hâc Ahmed Ağa’dan def‘-i meşrûhuna mutâbıka beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Hacı Bayram Kaftânî mahâllesinde sâkin Mehmed Ağa b. el-Hâc Mustafa ve zikr olunan Firuz Ağa mahâllesinde sâkin Mehmed Ağa b. İbrahim Efendi li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka şahsı rü’yetimiz ile ma‘lûmumuz olan müteveffât-ı mezbûre Âişe Hatun ibneti’l-merhûm Ahmed Efendi b. Abdullah hâl-i kemâl-i sıhhatinde bundan altı sene mukaddem zevci mezbûr el-Hâc Ahmed Ağa’ya zimmetinde mütekarrer ve ma‘kūdün-aleyh olan yirmi dört bin akçe mehr-i müeccel hakkını bizim huzûrumuzda hibe-i sahîha-i şer‘iyye ile hibe ve temlîk ol dahi ber-vech-i muharrer meclis-i hibede ittihâb ve kabûl edip mezbûr el-Hâc Ahmed Ağa’nın zimmeti berî olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan Ali Çelebi b. Abdullah ve Mehmed Beşe b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 26 min-Cumâdelûlâ sene 1143. Şuhûdü’l-hâl: Mehmed Ağa b. el-Hâc Mustafa, diğer Mehmed Ağa b. Ahmed Efendi, Ali Beşe b. Ebubekir, Ahmed Çelebi b. Abdullah, diğer Ali Beşe b. Mustafa, Ali Çelebi b. Mehmed, Mehmed Beşe b. Hasan