Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 70 Hüküm no: 31 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fatıma Hatun’un vefatıyla kızı Şerife Habibe’ye vasi ve nazır tayini Mahmiye-i İstanbul’da Balat kapısı dâhilinde el-Hâc İsa mahâllesinde sâkine iken bundan akdem vefât eden Şerîfe Fâtıma Hatun bt. Mehmed’in sadriye sagīre kızı Şerîfe Habibe’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīre-i mezbûrenin min-kıbeli’l-üm ceddesi ve babası müteveffâ Mehmed Ağa’nın terekesinden hisse-i ırsiyesini zabt ve hıfza kıbel-i şer‘den mansûbe vasîsi olan işbu bâ‘isetü’l-kitâb Şerîfe Emetullah Hatun bt. Halil’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûre Şerîfe Habibe’nin vakt-i rüşd ü sedâdına varınca tesviye-i umûruna vasî ve üzerine sagīre-i mezbûrenin hâlleri Mustafa Çavuş ve Ali Ağa ibney Mehmed’i hasbî nâzırlar nasb u ta‘yîn buyurup onlardan her biri dahi vesâyet ve nezâret-i mezbûreyi kabûl ve hizmet-i lâzımelerini kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 29 min-Cumâdelûlâ sene 1143. Şuhûdü’l-hâl: el-Hâc Hasan Efendi b. Abdurrahman, Mahmud Ağa b. Osman, Ali Ağa b. Sakā Mehmed, Hüseyin Çelebi b. (°) çukadâr, Mustafa Çelebi b. (°) muhzır