Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 71 Hüküm no: 32 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefatından sonra vasiyetini yerine getirmek üzere Süleyman’ı vasi tayini Mahmiye-i İstanbul’da Balat kapısı dâhilinde el-Hâc İsa mahâllesinde sâkine iken bundan akdem vefât eden Şerîfe Fâtıma Hatun bt. Mehmed’in ber-vech-i âtî vasiyy-i muhtârı olduğunu iddi‘â eden işbu bâ‘isü’l-kitâb es-Seyyid el-Hâc Süleyman b. el-Hâc Ali meclis-i şer‘-i şerîf-i enverde müteveffât-ı mezbûrenin vâlidesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Şerîfe Emetullah Hatun bt. Halil mahzarında üzerine da‘vâ ve takrîr-i kelâm edip müteveffât-ı mezbûre Şerîfe Fâtıma Hatun bt. Mehmed b. Abdullah hâl-i marazında fevti günü bi-iznillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup düyûn-ı müsbetem edâ olundukdan sonra bâkī kalan terekenin sülüsü ifrâz olunup sülüs-i mezbûrdan kadr-ı ma‘rûf meblağ ile ıskāt-ı salâtım oluna ve kadr-ı ma‘rûf meblağ ile iki mushaf-ı şerîf iştirâ olunup müstahakkına verile ve kadr-ı ma‘rûf meblağ ile tabh-ı ta‘âm ve it‘âm-ı fukarâ oluna ve sülüs-i mezbûrdan fazla kalır ise vücûh-ı birre sarf oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırraten aleyhâ vefât etmekle tenfîz-i [7a] vesâyâ murâd eylediğimde mezbûre Şerîfe Emetullah mâni‘a olur, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından İmam Hasan Efendi b. Abdurrahman ve Mehmed Çelebi b. Osman li-ecli’ş-şehâde meclis-i şer‘a hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Şerîfe Fâtıma Hatun bt. Mehmed b. Abdullah hâl-i marazında [fevti] günü bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup düyûn-ı müsbetem edâ olundukdan sonra bâkī kalan terekemin sülüsü ifrâz olunup sülüs-i mezbûrdan kadr-ı ma‘rûf meblağ ile ıskāt-ı salâtım oluna ve kadr-ı ma‘rûf meblağ ile iki mushaf-ı şerîf iştirâ olunup müstahakkına verile ve kadr-ı ma‘rûf meblağ ile eyyâm-ı mübârekede tabh-ı ta‘âm ve it‘âm-ı fukarâ oluna ve sülüs-i mezbûrdan fazla kalır ise vücûh-ı birre sarf oluna deyü vasiyet edip tenfîzine işbu müdde‘î-i mezbûr es-Seyyid el-Hâc Süleyman’ı huzûrumuzda vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırraten aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 29 min-Cumâdelûlâ sene 1143. Şuhûdü’l-hâl: Mustafa Çavuş Ağa b. el-Hâc Mehmed, Ali Ağa b. el-Hâc Mehmed, el-Hâc Hasan Efendi b. Abdurrahman, Mahmud Ağa b. Osman, Ahmed Çelebi b. Hasan muhzır, Hasan Ağa b. Mehmed, Hüseyin Çelebi b. İslam, Mustafa Çelebi b. Hasan