Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 72 Hüküm no: 33 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Musa Ağa’nın zeamet mahsulünden olan iki yüz guruşun kassam defterine dahil edildiği Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i enverden Mevlânâ el-Hâc Feyzullah Efendi irsâl olunup ol dahi mahmiye-i İstanbul’da Mahmudpaşa mahâllesinde sâkin fahrü’l-emâsil ve’l-a‘yân Hasan Ağa b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûre ahâlîsinden olup vilâyet-i Rumeli’nde Kalos kasabasında misâfiren sâkin iken bundan akdem vefât eden Musa Ağa b. Ahmed’in sulbî sagīr oğlu Mehmed’in tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Osman Beşe b. Ahmed meclis-i ma‘kūd-ı mezkûrda müteveffâ-yı mezbûrun etbâ‘ından işbu bâ‘isü’l-kitâb Ali Çelebi b. Ahmed mahzarında ikrâr ve takrîr-i kelâm edip müteveffâ-yı mezbûrun ze‘âmeti mahsûlünden olmak üzere iki yüz yirmi guruşu bi’l-emâne ahz u kabz etmekle meblağ-ı mezbûr iki yüz [guruşu] bana def‘ ve teslîm ben dahi defter-i kassâma idhâl için bi’l-vesâye yedinden tamâmen alıp kabz eyledim, min-ba‘d meblağ-ı mezbûr iki yüz yirmi guruşdan mezbûr Ali Çelebi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâlî mevlânâ-yı mezbûr mahâllinde tahrîr ba‘dehû ma‘an irsâl olunan Çukadâr Ahmed Çelebi b. Mehmed ve diğer Ahmed Çelebi b. (°) ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 25 min-Cumâdelûlâ sene 1143. Şuhûdü’l-hâl: Fahrü’l-akrân Osman Ağa b. Abdullah, el-Hâc Mehmed Ağa b. Abdullah, Abdülkerim Ağa b. Abdülkadir, el-Hâc Mehmed Ağa b. Abdullah, Ahmed Çavuş b. Mehmed, Ahmed Çelebi b. Mehmed, Ali Ağa b. Abdurrahman, Mustafa Çelebi b. Mehmed