Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 72 Hüküm no: 34 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Musa Ağa’nın zeamet mahsulünden olan yüz guruşu çalışanlarından Ahmed Çelebi’nin ödediğine dair şahitleri olduğu Kezâlik meclis-i mezbûrda mahâlle-i mezbûre ahâlîsinden olup vilâyet-i Rumeli’nde Kalos kasabasında misâfiren sâkin iken bundan akdem vefât eden Musa Ağa b. Ahmed’in sulbî sagīr oğlu Mehmed’in tesviye-i umûruna bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Osman Beşe b. Ahmed meclis-i ma‘kūd-ı mezkûrda müteveffâ-yı mezbûrun etbâ‘ından işbu bâ‘isü’l-kitâb Ahmed Çelebi b. Ali mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûrun taht-ı iltizâmında olan Menemen kazâsı ze‘âmetinin rüsûm ve müşîriyesi cem‘ ü tahsîle bi’l-emâne tarafından zabt ve mahsûlâtından yüz guruş makbûz olup meblağ-ı mezbûru bi’l-vesâye taleb eylediğimde edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûr Ahmed Çelebi cevâbında ber-vech-i muharrer ze‘âmet-i merkūmeyi bi’l-emâne zabt ve mahsûlâtından meblağ-ı mezbûr yüz guruşu kabzını ikrâr lâkin müteveffâ-yı mezbûr Musa Ağa b. Ahmed b. Abdurrahman’a hayâtında târîh-i fevtinden beş ay mukaddem meblağ-ı mezbûr yüz guruşu huzûr-ı Müslimînde edâ ve teslîm edip meblağ-ı mezbûrdan zimmetim berî olmuşdur deyü def‘le mukābele edicek gıbbe’l-istintâk ve’l-inkâr mezbûr Ahmed Çelebi’den def‘-i meşrûhuna beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Tavukpazarı kurbünde sâkin Hasan Çelebi b. Abdullah ve mahâlle-i mezbûrede sâkin Ali Çelebi b. Osman li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka işbu mezbûr Ali Çelebi müteveffâ-yı mezbûr Musa Ağa b. Ahmed b. Abdurrahman’a hayâtında târîh-i fevtinden beş ay mukaddem ze‘âmet-i merkūme mahsûlünden olmak üzere yüz guruşu huzûrumuzda edâ ve teslîm edip meblağ-ı mezbûr yüz guruşdan mezbûr Ali Çelebi’nin zimmeti berî olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli ilâ âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn